الفراق عنوان حبنا فاطمه علي

_انتى ازاى تدخلى اوضتى وتقلبى فى حاجاتى

_ااااا انا

_انتى ايه واضح انك اخدتى مساحه فى حياتى اكتر من حقها اه متربين سوا بس الوضع اختلف دلوقتى احنا كبرنا ولازم تعرفى حدودك ومتدخليش اوضة ولد يا هانم يا محترمه .. ايه مش قادرة تصبرى كنت هقولك انى هتنيل اسافر لكن ازاى تصبرى تدخلى وتقلبى فى حاجاتى

الصدمه شلت لسانى وكل حواسى دا اهانى وخلانى اد ايه انا وحشه قدام نفسى … معاك حق انا اسفه .. بدأت امشى وانا حاسه ان كل حته فيا بتترعش وبباه ومامته وماما وبابا جم على صوته

_ ايه يا ولاد فى ايه

محدش فينا رد بس انا اخيرا قدرت اهرب منهم وجريت طلعت على شقتنا ودخلت اوضتى وقفلت على نفسى وفضلت اعيط كتير وبابا وماما حاولوا يكلمونى بس مكنتش بتكلم مع حد ابدا وعدا على اليوم دا اسبوع ودخلنا فى الامتحانات ومكنش بيسأل عليا ابدا اد ايه هو معندوش ډم وقاسى وانا غلـ,ـطانه انى بحب واحد زيه … بس مقدرش انا مطمنش عليه خصوصا انه اخر سنه كل يوم اكلم طنط الهام ومن غير اى كلمه تقولى ان امتحانه كان كويس وبحمد ربنا انها فهمانى ما هى عارفه انى بحب الجبله ابنها

_ ابرار تعالى

يا حبيبتى

_نعم يا زوزو يا قمر

_ اطلعى ودى الحاجه دى عند طنط الهام

_ايوا يا ماما بس

_ اسامه مش فوق قالتلى انه نزل يلا اطلعى اخلصى

_حاضر يا حجه بس متزوقيش

لبست خمارى وطلعت واول ما قربت من الباب سمعت صوتهم عالى .. ايه دا دا كمان اسامه موجود كنت لسه هنزل بس سمعته بيقول اسمى استنيت اشوف بيقولوا ايه انا مش قصدى تصنت والله بس الموضوع واضح انه يخصنى

_ مالها ابرار هو فى اجمل منها ولا فى اخلاقها وكمان عرفاك وحفظاك وبتحبك

—

وانت كمان بتحبها بس انت اللى مش عارف مشاعرك

_ انا احب ابرار دى اختى اللى كنت بقعد اذاكر ليها انا عمرى ما شوفتها زوجه ليا وانا عمرى ما حبتها

_ طب يا ابنى هتسافر وتسيبنا انا وابوك لوحدينا اقعد معانا واتجوز ابرار

_ ابرار ابرار ابرار بقالك اسبوع مفيش على لسانك غير ابرار .. ابرار زعلانه .. صالح ابرار يا اسامه .. يا ابنى انت زعلتها .. ما تتفلق وهى تدخل اوضتى ليه وتفتش فى حاجاتى وكمان اخسر حلم عمرى انى اخد الماجستير والدكتوراه من المانيا علشان خاطر ابرار انا حتى لو قعدت مش هتجوزها انا مبحبهاش ولا عمرى فكرت فيها هى مجرد جارتنا وبس