عشق خـ،ـ،ـادع ياسين وملك كريمه حماده 1

” ابتسمت بحنين للذكريات دى … مسحت دموعها بهدوء وضحكت بخفوت وقالت:
صدق اللى قال إن دى لهفة البدايات فعلا … وبعدين بيجى الخازوق. بصت للسما وابتدت تغنى:
جرح المشاعر اكبر من جرح الخيانة
وهقولك ايه إذا كان دا شىء عادى فى حياتك
دانا لو نسيت نفسى مبنساش يوم هوايا
وفاكرنى ايه زيك بقيت من زكرياتك
انا امتى نسيتك ولا عشان أنا مش بتكلم
” غمضت عيونها. بتعب وشدت الغطا عليها كويس. وابتدت تروح فى النوم. كانت على وضعيتها دى وهى فى البلكونة.

/ ياسين مالك، انت قاعد كدا ليه ياااسين رد عليا يا صاحبى ايه حالتك دى

_ طلعت بريئة يا خالد، بريئة

/ ايه؟ قصدك ملك

” حالته غريبة فى اللحظة دى … قاعد على الأرض وحواليه الصور مبعثرة. وماسك التسجيل في أيده وضاغط عليه جامد. وشمه محمر وشعره نازل على عيونه … دموعه بتنزل بصمت وتايهة … صدمته فى أخته شديدة ومش قادر يستوعب من اللى بيسمعه بصوتها … بص لخالد بتوهان وقال:

طلعت بريئة يا خالد، طلعت نقية وجميلة زى ما عرفتها، ملك اللى حبيتها هى نفسها مش واحدة تانية زى ما شكيت فيها

خالد بحزن: قولتلك يا صاحبى ملك متعملش كدا مصدقتنيش. قولتلك هتندم يا ياسين

ياسين بالم: ازاى انت الغريب كانت واثق فيها وانا حبيبها كدبتها

” حزن خالد عليه وبصله بشفقة … طبطب عليه بهدوء وكمل ياسين بنفس النبرة:

قولتلها أنها خاينة ومخادعة … قولتلها انتى مش نوعى المفضل ومش تستحقى الحب … هنتها بالكلام كتير ووصلتها لمرحلة أنها تقص شعرها بسببى يا خالد ، كانت دايما بتقولى انا امانها يا خالد. وانا عملت ايه؟ انا ضيعتها بايدى، كسرتها بنفسى، كسرت اغلى إنسانة كانت على قلبى يا خالد، هتقدر تسامحنى تانى؟ هتقدر ترجع تثق فيا من تانى طيب؟ هتقدر تحبنى من تانى بعد ما كرهتنى

/ ازاى عرفت الحقيقة يا ياسين

” ضغط ياسين على التسجيل واشتغل صوت رغد وهى بتعترف بالحقيقة … اخده منه خالد وهو بيسمع بصدمة شديدة ومش قادر يصدق اللى بيسمعه … مسك ياسيين الصور وفضل مركز فيها بشرود … كانت ل”…. ” وبنت تانية غير ملك خالص.

خالد بصدمة: ازاى؟ ايه اللى بسمعه دا معقول رغد تعمل دا كله

” ضيق ياسين عيونه بغضب وهو ضامم أيده وضاغط عليها. افتكر اليوم اللى رفض فيه جاسم لما اتقدم لرغد:

اقسم بالله يا رغد لو مبعدتيش عن الشخص دا لتشوفى منى وش عمره ما هيعجبك ابدا

_ بس أنا بحبه يا ياسين متقدرش تبعدنى عنه

: انا أقسمت يا رغد، متخلنيش استخدم معاكى اسلوب عمرك ما هتحبيه

_ شايفة ابنك يا ماما، قوليله أنى بحب جاسم يا ماما ولا عشان هو مش من مستوانا بترفضه يعنى

: انتى عارفة كويس اوى انى اخر همى المظاهر والفلوس. بس دا شخص محدش يأمن على حياته معاه يا رغد افهمى

_ انا بثق فيه وهو بيحبنى فعلا يا ياسين ارجوك اديله فرصة عشان خاطرى

” بص ياسين لوالدته وهى هزت راسها بمعنى لا … اتنهد وقال: دا اخر كلام عندى يا رغد … ويكون فى علمك عمر اللى بيشتغل عندى فى الشركة متقدملك وانا موافق

_ يا يا ياسين لا مش هسمحلك تدمر حياتى ابدا، انا مش موافقة على عمر خالص ومش موووافقة

: كلمتى مش هرجع فيها يا رغد، فهمتى

” اتنفست بغضب وقالت بنبرة حاقدة: ماشى يا ياسين وانا موافقة اتجوز عمر دا، بس يكون فى علمك متزعلش منى اللى هعمله بعدين وافتكر انك بتظلم اختك على حساب حد تانى … وانا مش هسكت ابدا على حقى يا ياسين

خالد: ياسين انت روحت فين

ياسين بهدوء مميت: دمرت حياتى فعلا زى ما قالت … بدل ما تشكرني انى انقذتها من شخص زى جاسم دا، خربت حياتى

خالد بهدوء: ياسين فوق كدا وركز … انت لازم تصلح دا كله

ياسين بوجع: اصلح ايه ولا ايه بس … هبص فى وشها تانى ازاى يا خالد، دى لو عرفت حاجة زى دى والله ما هستحمل منها حتى العتاب

خالد بحدة طفيفة: اسمع ياسين انت الاول لازم تواجه اختك وتقولها الحقيقة وهى اتقبلت أو لا مش مهم بس المهم تكون ارتحت شوية … ارجع فوق يا ياسين وحاول ترجع مراتك من تانى ليك، هتعانى معاها وهتتعب عشان تقدر تتقبل ياسين القديم من تانى، بس لازم ترجعها ليك يا ياسين

: عايزنى اروح اقولها انا شكيت فيكى وسمعت عنك كلام وصدقته. مقدرش اعمل كدا مقدرش

_ متقولهاش دلوقتى، حاول بس انك تصلح اللى هببته دا وتخليها ترجع تثق فيك من تانى وبعدين احكيلها الحكاية من أولها: انا لازم اروحلها دلوقتى، لازم اطمنها انى مسافرتش

خالد بصرامة: لا مش دلوقتى يا ياسين. انت هتفضل هنا تلات ايام كدا حاول تهدأ وتفكر هتعمل ايه مع رغد وبعدين هنفوق لملك

” سكت ياسين. خالد عنده حق مينفعش يرجعلها من دلوقتى ويقولها انا موجود ويلا ننسى كل حاجة حصلت ونبدأ من جديد … بس على قد وجع قلبه على ملك، وجع قلبه من أخته كان أكبر، صدمته فيها كانت شديدة عليت. مكانش متوقع أنها تعمل كدا فيه عشان خاطر واحد تانى ميستهلش…