امى زمان
امي زمان كانت رقاصه في الموالد .. وعندنا في الريف الرقاصه دي واحده ملهاش كرامه
ابويا حبها زمان و قرر يتجوزها وتبطل رقص .. هي كانت يتيمه ومقتوعه من شجره ملهاش حد ومن يوم ما فتحت عينيها علي الدنيا اتربت في ملجا.. واول مكبرت دورت علي شغل كتير ملقتش وكانت بترقص علشان تصرف علي نفسها وكانت تتمني تسيب الشغلانه دي.. علشان كده فرحت جدا لما بابا عرض عليها يتجوزها وتبطل رقص
اهل ابويا رفضو الجوازه دي ولما لقوه مصمم قالو له لا تعرفنا ولا نعرفك ولو مصمم تتجوزها انسانا خالص
ابويا كان شايف امي انسانه كويسه وشكلها بنت ناس مش وش بهدله.. قرر يتجوزها رغم معارضه اهله … وفعلا اتجوزها وعاشو هنا في القريه .. بس الناس مسابوهمش في حالهم.. متقبلوش ان امي الرقاصه. تسكن معاهم … فضلو طول الوقت .. الرقاصه راحت الرقاصه جت.. جوز الرقاصه راح جوز الرقاصه جه.. وكلام جارح كتير
كل ستات القريه كانو بيكرهو امي .. دايما شايفين فيها الرقاصه الي هتختف رجالتهم منهم..مكانش حد عامل احترام او تقدير لابويا
بعد فتره امي حملت في اخويا الكبير وقتها بابا قال مينفعش ابني الي جاي يعيش يسمع الكلام ده عن امه.. وقتها بابا اخد القرار واخد ماما ولمو حاجتهم وراحو قريه بعيده محدش يعرفهم فيها وقررو يعيشو بعيد عن الناس وجابو اخويا الكبير وبعده جابوني انا وبعد كده جابو بنتين توام .. وعيشنا ولا نعرف حد ولا حد يعرفنا ولا نتكلم مع حد
كان بابا بيشتغل ويجيب لنا اكل .. بس اكل علي اد الحال .. عيش وفول ..او عيش وجبنه واوقات بيكون عيش حاف
كبرنا واحنا راضيين بعيشتنا.. ابويا وامي ربونا علي القناعه والرضا.. عمرنا مانبص لحاجه في ايد غيرنا ولا نفكر غيرنا عايش ازاي واحنا عايشين ازاي.. وفعلا الحمد لله عمرنا ما طمعنا في حاجه مع حد
اخويا اول ما كمل ١٧سنه سابنا ومشي ومعرفناش عنه حاجه.. بابا فضل يدور ويسال عليه بس من غير فايده .. امي تعبت من الزعل علي اخويا .. وبعدها بشويه ابويا تعب ومبقاش قادر يشتغل
كان عمري وقتها ١٥سنه واخواتي ١٢ سنه
قررنا انا واخت من اخواتي نشتغل بدل ابونا والاخت التالته تقعد في البيت تراعي امي وابويا وتشوف طلبات البيت
بقيت انا واختي نجيب مناديل وليمون ونعناع ونروح مدينه قريبه من قريتنا ونقف في الشارع نبيع الحاجات للناس والعربيات الي معديه.. كنت باخد تمن الحاجه الي ابيعها بالظبط ولو حد حاول يديني فلوس زياده او يديني فلوس من غير مياخد مني حاجه كنت برفض .. انا بياعه مش شحاته
