بكل حب
– لحظه أشوف في مكان جوه ولا لأ , المطعم ده دايمًا زحمه .
نظرت للمطعم ثم قالت :
– المطعم ده بالحجز أصلاً أنت حاجز ؟
– لا , بس لو في مكان هنقعد.
– طب ماتيجي نقعد في مكان تاني !
ابتسم ببرود يقول :
– مبرتاحش غيرهنا .
تركها واتجه للداخل , غاب لأكثر من نصف ساعه , حقًا أنتابها الملل كثيرًا , وكلما دقت له علي الهاتف يفصل الخط , رأته يأتي وبيده حقائب كرتونيه عليها إشعار المطعم , دلف للسياره ووضع الحقائب بالمقعد الخلفي وقال :
– فعلاً المكان زحمه , قلت أجيب دليفري وخلاص ..
كاذب , المكان لم يكن ممتلئ بل هو من تعمد هذا , ربما لن يقدر علي جعلها تغير ثيابها أو تقلل زينتها , يعلم ردها عليهِ إن أصر علي هذا , ومن الأساس لا يرغب في أن يبين له حنقه علي ما ترتديه , فتصرف بذكاء ماكر كي يصل لمبتغاه .
شهقت بصدمه تقول :
– يعني ملبسني ومنزلني عشان نجيب دليفري ونرجع ! هو مفيش غير المطعم ده!
– قلتلك مبرتاحش غير فيه , كمان مين قالك أننا هنروح ده أنا هاخدك مكان عظمه دلوقتِ .
نظرت له بجانب عيناها تقول :
– بجد ؟
أومئ بتأكيد فابتسمت بحماس تقول :
– طب يلا بقي عشان نلحق ناكل قبل الاكل ما يبرد .
أومئ مبتسمًا واتجهوا للمكان المنشود …
بعد دقائق كان يقف بالسياره أعلي جبل المقطم ..
ترجل وجعلها تترجل معه وأطفئ مصابيح السياره , جلب أكياس الطعام واتجه لها حيث ثقف أمام السياره , أتكأ علي مقدمة سيارته وأخرج الطعام يضعه فوقها علي ضوء الإناره الخفيفه الآتيه من بعيد ومن أسفل الجبل ..
استمع لتذمرها وهي تقول :
– بقي ده المكان العظمه! جايبني الجبل يا سليم! لا وكمان مختار مكان بعيد حتي عن الأماكن الي فيها الناس , هو أنت خاطفني !؟
ابتسم وهو يسحبها من يدها ناحية مقدمة السياره , وبغتةً رفعها لتجلس عليها , شهقت بخضه وهي تنظر له بفاه مفتوح , في حين عاد هو كما كان وتمتم ببرود :
– أكيد مش هتعرفي تقفي بالكعب ده .
أشار لكعب حذائها العالي والرفيع في آنٍ واحد , الذي لا يتناسب مع طبيعة الأرض الصخريه للجبل .
استمعت له يكمل وهو يعطيها ساندوتش ( البرغر ) الملفوف بعنايه :
– مفيش أحسن من الهدوء , شايفه الجمال وشكل المباني حلو ازاي و ….
قاطعته بغيظ تقول :
– أنت لي محسسني أني أجنبيه وأول مره أجي هنا ! علي فكره جيت هنا كتير جدًا مع بابا الله يرحمه ومع صحباتي .
– عارفه بيقولك أنك ممكن تروحي المكان أكتر من مره ومتستمعيش بجماله , في حين ممكن تروحيه مره وتحسي أنك أول مره تشوفيه .
قطبت حاجبيها تقول :
