ترنيمه روح نجلاء ذكي

-تسلم يا ابو آية فكر يا خويا فى الكلام وربنا يعمل اللى فيه الخير

تمر الايام وآية تلتحق فعلا بكلية الحقوق ومجدي ووالدته يلحون فى زواجه منها ومع الحاح تهانى والدة آية رضخ عبد المحسن لذلك على شرط ان تتم الخطبة والزواج بعد ان تنهى عامها الاول وبالفعل يتحدد الموعد ويقوم عبد المحسن بدعوة الاستاذ عادل وزوجته وكذلك ابنه عمر وزوجته سما

-منتظرينك النهاردة يا استاذنا

-ان شاء الله يا عبده وانا اتاخر على آية ولو انى شايف انك مستعجل اوى على جوازها دى لسه صغيرة

-اعمل ايه فى امها قاعدة تزن عايزة تطمن عليها دى بنتنا الوحيدة وانت عارف جت بعد شوقة واحنا كبار فى السن عماله تقول لو حصل لينا حاجة مين هيكون سندها

-كبار ايه يا راجل انت عايز تكبرنا ولا ايه

-ياه يا استاذنا انا بشتغل مع حضرتك من ثلاثين سنة تقريبا من اول مكتب حضرتك فتاحته

-اه يا عبده فاكر المكتب الصغير اللى كان عندكم فى الحارة كنت انت قايم بكل حاجة عمري ما انسى تعبك معايا من اول ما بدات لغاية ما بقى اسم عادل الجيزاوى زى الطبل انت كنت نعم الاخ يا عبده

-يا استاذنا متقولش كده هى العين تعلى عن الحاجب

-وانت عندك شك انى مش بعتبرك اخويا

-لا الشهادة لله حضرتك كنت دايما جنبى احسن من الاخوات ربنا يديم المحبة

-طب يا راجل يا طيب خد المبلغ ده علشان حفلة الخطوبة انا عايز آية تكون مبسوطة ليحاول عبد المحسن الاعتذار عن اخذ المبلغ

-خيرك سابق يا استاذنا كل حاجة اتحضرت خلاص

-خلاص ادى المبلغ لآية هتحتاجه فى جهازها ولو عايز حاجة انا موجود ليطرق باب المكتب ويدخل عمر ابن الاستاذ عادل ويعمل معه فى المكتب

– مبروك يا راجل يا طيب وعقبال ما تفرح باولادها

-تسلم يا استاذ عمر وهننتظرك النهاردة

-ربنا يسهل يا عم عبده انت عارف سما من يوم ما ادهم باشا شرف وهى حبسانا فى البيت خايفة عليه

-ربنا يبارك فيه وتشوفه عريس

-تسلم يا عم عبده بارك لآية وللست ام آية وان شاء الله احاول اجى مع الوالد

لياتى حفل الخطوبة وجميع الحضور بين راقص ومهنئ لتلك الجميلة ولزينة شباب الحارة وبالفعل ياتى الاستاذ عادل وابنه ليقدم التهانى وعندم يتقدم عمر للتهنئة

-مبروك يا آية

-الله يبارك فيك يا استاذ عمر عقبال ادهم

-مبروك يا استاذ ربنا يتمم لكم بخير ليرد عليه مجدى بغلاظة