ترنيمه روح نجلاء ذكي
وبمكتب الاستاذ عادل وبعد ان استقر عبد المحسن فى منزله الجديد كان يتحدث مع الاستاذ عادل بعرفان
-والله يا استاذنا مش عارف اشكرك ازى الصراحة الشقة جميلة ومكانها راقى جدا وآية والبنات فرحنين لولا وساطة حضرتك لصاحب العمارة مكناش اخدناها بالسعر ده ابدا
-متقولش كده يا عبده سبق وقولت لك انك اخ ليا ومفيش بين الاخوات شكر
-تسلم يا استاذنا آية فعلا من يوم ما اتنقلنا وهى وشها نور تانى بس مطلعة عينى كل يوم بتدور على شغل وكل ما اقول لها يا بنتى انا موجود وارتاحي علشان صحتك ترفض وتقول مش عايزة اتقل عليك يا بابا كفاية اللى دفعته فى الشقه ومهما افهمها ان الشقة دى فلوس متشالة وكده كده امان ليكى ولبناتك مش عايز تريحنى ولا تريح نفسها
-خلاص يا عبده سبها فعلا تشتغل خليها تخرج وتقابل ناس و تتعامل علشان بردو قعدتها فى البيت مش حلوة على نفسيتها
-عارف يا استاذنا بس بردوا هتشتغل ايه منه لله مخلهاش تكمل كليتها فاى شغل هيبقى مرهق ليها يعنى هتشتغل ايه بالثانوية العامة
-طب سيب ليا الموضوع ده وانا هشوف لها شغل مناسب ليها ثم يصمت قليلا ويتحدث
ممكن آية تشتغل فى الحضانة بتاعة سندس بنت اخويا اخت المرحومة سما ومرات دكتور ايهاب كمان ما انت عرفها وكانت دايما سما الله يرحمها بتحكى لها كتير عن آية ،انا هكلمها وان شاء الله يكون ليها شغل هناك سندس دايما بتساعد الغريب مش هتساعد القريب وبعدين هى متتخيرش عن ايهاب ودايما كانت متابعة حالتها معاه
-والله يا استاذنا مش عارف اقولك ايه الشكر بقى قليل على اللى بتعمله معايا انا وبنتى
-هزعل يا عبده يلا على مكتبك علشان اول ميعاد للموكلين خلاص قرب
ليتركه وهو يشعر بالعرفان لذلك الشخص الذى دائما ما يكون ضهر وسند له
**************************************
نذهب الى الحارة التى كانت تقطن بها اية فبعد زواج مجدي ودلال استطاعت ان تسرق لبه بافعالها ودلالها عليه لقد اصبح يجلس بجوارها بالمنزل واهمل عمله بالورشه حتى والدته لم يزورها منذ اكثر من شهرين وللاسف نعمة كل يوم قلبها يغضب اكثر على ابنها فهو حتى لم يسأل على بناته اين انتقلوا ولا كيف يعيشون للاسف اصبح عبد لرغباته ورغبات دلال
-مجدى ميجو حبيبي انا كان عجبنى خاتم انما ايه عند عم جورج الصايغ مش هتجيبه لدلال حببتك يهون عليك حبيبة قلبك تكون نفسها فى حاجة
