معركه باب التلاجه منى السيد 1

حمـاتي كانت بتدخـل شقتـي بالمفتـاح وإحنـا بـره… تفتـح التلاجـة، ترمـي أكلـي، وتطبـخ اللي هـي عايـزاه وكـأن البيـت بيتـها…!!!
بيقولوا البيوت أسرار ومملكة للست.. بس كل ست بيت عارفة إن حروب السيطرة الحقيقية مش بتبقى في الصالون ولا غرف النوم، الحرب الحقيقية بتولع في المطبخ! وبالتحديد قدام باب التلاجة، هناك بتطبخ المؤامرات أكتر من مسلسلات رمضان… حصري على صفحة روايات و اقتباسات…
أنا شيريـن بنيت مملكتي الصغيرة بكل حب. مطبخ أمريكان واسع، ألوان متناسقة، وتلاجة دولابين كبيرة.. كانت هي فخري وعزّي. كل علبة وكل برطمان محطوط بالمسطرة. وفي وسط النظام ده، ظهرت هي.. حـماتي، طنـط ناديـة.
أنا وجـوزي طـارق اتجوزنا وإحنا كبار وناضجين، يعني كل واحد فينا ليه طباعه ونظامه في الحياة. فرشانا شقتنا على ذوقنا من أول لون الحيطة لحد رف التوابل. الدنيا كانت ماشية زي الفل، لحد ما طارق نطق الجملة اللي غيرت التاريخ:
— شيرين، أنا اديت نسخة من مفتاح الشقة لماما، عشان لو ماسورة ضربت وإحنا في الشغل وما نتبهدلش.
حكايات_منـي_السيـد
أنا بطيبتي هزيت راسي ووافقت، طنط نادية كانت دايماً بتبتسم ولسانها حلو.. بس يا سذاجتي!

أول كام شهر الزيارات كانت خفيفة: تجيب صينية بسبوسة، تشكر في نظافتي.. لحد ما رجعت في يوم من الشغل، وشميت ريحة تقلية بصل قالية الشقة كلها! دخلت المطبخ لقيت طنط نادية واقفة بكل ثقة، رابطة فوطة المطبخ البيضاء بتاعتي الجديدة حولين وسطها، وبتقلب في حلة محشي كرنب ومسبك مطلع دخان.
أما الصدمة الكبيرة فكانت لما بصيت ع التلاجة.. البابين مفتوحين على الآخر، وعلى الرخامة كومة أكل من تلاجتي: سلطة الكينوا والجرجير بتاعتي، برطمان باتيه مستورد غالي، وقالب جبنة ريكفور شرياه بالشيء الفلاني.. كل ده محطوط في كيس زبالة أسود!
قالت : طنط نادية؟ هو.. هو إيه اللي بيحصل هنا؟
حماتها قالت برود وابتسامة: شيرين يا حبيبتي! حبيت أعملك مفاجأة. فتحت تلاجتك لقيت كلها خضار ناشف وجبنة معفنة وريحتها غريبة، قمت رامية القرف ده كله! وعملتلكوا حلة محشي وبطاية ترم عضمكم.. طارق خس النص يا بنتي!
نفسي اتقطع! الباتيه المستورد والركفور في الزبالة؟ وهي واقفة تضحك ومش شايفه دمي اللي بيغلي.
بالليل جيت أشتكي لطارق:
— طارق، مامتك رمت أكل بآلاف الجنيهات في الزبالة! دي بتعدي حدودها!