اسيره الجاسر اميره موسى

البارت الاول

كانت ليليان بتغيّر هدومها في أوضتها عشان تستعد ليوم جديد في شغلها، وفجأة سمعت صوت مامتها بتنادي عليها:

رانيا: ليليان

ليليان وهي جوه: نعم يا ماما؟

رانيا: يلا عشان تفطري.

ليليان: هخلص لبسي واجي.

لفّت ليليان خمارها اللي بيخلي شكلها زي الملاك، وطلعت من الأوضة. قربت من مامتها، وباستها على خدها:
ليليان: صباح الخير يا ماما.

رانيا: صباح النور، اقعدي يا حبيبتي افطري عشان ما تتأخريش على شغلك.

ليليان: أومال بابا فين

رانيا: بيصلي، هيجي دلوقتي.

ليليان: هستناه لحد ما ييجي.

رانيا: كده هتتأخري.

ليليان: عادي، أهم حاجة نفطر كلنا مع بعض.

في اللحظة دي، طلع صبري من الأوضة وهو بيبتسم:
صبري: صباح الخير يا دكتورة.

ليليان: صباح النور يا بابا.

قعدوا كلهم على السفرة، وبدأوا يفطروا، لحد ما مي اتكلمت وهي بتبص لوالدها:
مي: بابا، كنت محتاجة مصاريف الجامعة.

صبري: كام يا مي

مي: 300 جنيه.

صبري: حاضر، فكّريني بعد الفطار أدهملك.
ثم بصّ لليليان: وانتي يا ليليان يا حبيبتي، هتنزلي امته مع خطيبك تجيبوا عفش الشقة

ليليان: اتفقنا ننزل يوم التلات.

صبري: يعني بعد بكرة

ليليان: أيوة

صبري: على خير إن شاء الله

سمعوا صوت عربية تحت وهما قاعدين بيفطروا، فقامت ليليان بسرعة: أكيد ده رحيم أنا هنزل بقى عشان ما أتأخرش عليه.

صبري: خلي بالك من نفسك.

ليليان: حاضر يا بابا، مع السلامة

رانيا: استودعكِ الله

نزلت ليليان تحت، ولقت عربية سودا واقفة، كان جواها رحيم في أواخر العشرينات. راكبته ليليان العربيه وقالت: صباح النور.

رحيم: صباح النور.

ركبته ليليان وراه في العربية، فقال رحيم بلهجة مستنكرة: تاني يا ليليان

ليليان: رحيم، إحنا اتكلمنا قبل كده في الموضوع ده.

رحيم: على فكرة، أنا خطيبك.

ليليان: على عيني وعلى راسي بس مينفعش إحنا مش متجوزين عشان أقعد جنبك.

رحيم مبتسم: هو إحنا كده قاعدين جنب بعض فيه فاصل بينا.

ليليان بهدوء: رحيم، أنا مرتاحة كده. عشان خاطري، بلاش كلام في الموضوع ده تاني.

رحيم: أنا عايز أقولك حاجة واحدة بس، قبل ما تكوني خطيبتي، انتي بنت خالتي، وأكيد بخاف عليكي

ابتسمت ليليان بخجل: أنا عارفة كده كويس، وبعدين يلا بقى، هنتأخر على شغلنا.

رحيم شغل العربية، واتحرك ناحية شغل ليليان. بعد شوية وصلوا قدام المستشفى. نزلت ليليان وقالت: شكراً على تعبك معايا.