اكتمال البدر نورهان العشري

بدر فضل واقف في الصالة لوحده، يضرب إيد في إيد وهو بيلوم نفسه: “ليه قلتلها كدة؟”، بس في نفس الوقت نار الغيرة كانت لسه بتاكل في قلبه كل ما يفتكر إن في حد غيره ممكن يبصلها.

★★★

البيت كان هادي، والست سميحة قاعدة في الصالة مع “منال” سلفتها وبنتها “سلمى” اللي كانت قاعدة بتعدل في لبسها وكل شوية تبص في المراية الصغيره اللي في شنطتها، مستنية رجوع بدر.

منال بدأت الكلام وهي بتشرب القهوة بصوت مسموع:

— ألا قوليلي يا سميحة ياختي. هو بدر مش كبر، بقى و آن الجواز يشوف حاله. المحل بسم الله ما شاء الله شايل اسمه وزيادة. عايزين نفرح بيه بقى. ابنك شال شيلة تقيلة من بعد حامد الله يرحمه، ونفسنا نشوفله بيت وعيال يملوا عليه دنيته.”

سميحة تنهدت بقلة حيلة:

— “يا ريت يا منال، ده أنا ريقي نشف معاه. كل ما أفتح السيرة يقلب الوش التاني ويقولي سيبيني في حالي.”

سلمى دخلت في الكلام بدلع وهي بتلعب في خصلة من شعرها:

— “يمكن يا طنط ملقاش اللي تخطف قلبه لسه؟ أصل بدر ده ذوقه صعب، وعايز واحدة تفهمه وتدلعه مش واحدة شايلة الهم طول النهار.”

في اللحظة دي، بدر دخل من باب البيت، وشه كان مجهد وعينه بتدور في الصالة. سلمى قامت وقفت بسرعة وبصتله بابتسامة عريضة:

— “حمد الله على السلامة يا بدر.”

بدر رد باقتضاب وهو بيحاول يعدي:

— “الله يسلمك يا سلمى.. أهلاً يا مرات عمي، منورين.”

سلمى حاولت تشاغله وهي بتقرب منه خطوة:

— “إيه يا بدر، انت تعبان ولا أيه؟ ده أنا حتى كنت جايبة لك معايا صنف أكل حلو عاملاه بإيدي، قلت لازم تذوقه وتقولي رأيك.”

بدر مسح على وجهه بتعب:

— “تسلم إيدك يا سلمى، ماليش نفس دلوقتي. بعد إذنكم هطلع أرتاح شوية.”حكايات نورهان العشري

بدر سابهم وطلع السلم، بس سلمى مراحتش قعدت، فضلت واقفة عند طرف الصالة اللي بيكشف طرف السلم وممر الدور التاني. شافت “نهال” وهي طالعة شقتها، كانت ماشية ببطء والزعل باين في عينيها.

بدر وقف قدامها فجأة على السلم، ونهال حاولت تعدي من جنبه من غير ما تبص له، بس هو مد إيده ومسك طرف عبايتها بلهفة:

— “نهال.. استني بس.”
الجزء الثاني

نهال وقفت من غير ما تلف وشها، وصوتها كان مخنوق:

— “عايز إيه تاني يا بدر؟ متهيألي قلت كل اللي عندك وزيادة امبارح.”