جمر الهيام نورهان محسن
تنهدت سندس وكأن صدرها أثقل من الجبال، وردت وهي تجاهد كي لا تدمع عيناها: إحنا ماعادش ينفع نقعد هنا يا جلال… الناس مش سايبانا ف حالنا، وسمعة البنت بقت على كل لسان
جلال عضّ على أسنانه بشدة، وهتف بحدة عارمة: قطع لسان اللي يجيب سيرة حد فيكو بسوء طول ما انا عايش ماتقلقوش من حاجة يا ست سندس، انا جيت النهارده مخصوص… عشان أطلب شهد في الحلال على سنة الله ورسوله
شهقت سندس من المفاجأة: إيه اللي بتقوله ده يا جلال؟ انت بتكلم جد يا بني؟!
أدار وجهه جانبًا، كأن كبرياءه يمنعه من كشف ما في صدره، ثم عاد يحدّق بعينيها بثبات، قائلا ببرود: وهي الامور دي فيها هزار يا ست سندس، انا اكتر من يعلم باللي حصل، وشهد ست العرايس وزينة بنات الحي كله ومفيش منها، الذنب مش ذنبها ولا ذنبكو، ومن الليلة هتبقي فيها مراتي وتشيل اسمي عهد عليا قدام ربنا هتكون في حمايتي لاخر يوم في عمري
في تلك اللحظة، كانت شهد خلف الباب نصف المفتوح، قدماها متصلبتان على الأرض، وعيناها دامعتان تتابعان كل كلمة خرجت من فمه، ظنّت لوهلة أن قلبها سيطير فرحًا، لكن كلماته كانت بمثابة خنجرًا اخترق أعماقها، فانسابت الدموع على وجنتيها بلا رحمة، لم تسمع في كلماته اعترافًا بحبٍ تترجاه منذ زمن، بل فقط شهامة جافة ورجولة عنيدة، زواج بلا عشق، مجرد عقد ليحميها من كلام الناس.
أرادت أن تخرج وتصرخ في وجهه: لأ… مش عاوزة جوازك ليا يبقي شفقة منك!
لكن قدماها ارتجفتا، وصوتها انحبس في حلقها، حتى إذا تشجعت لتواجهه كان هو قد أنهى حديثه مع سندس، ثم دار بظهره وغادر الدرج بخطواتٍ حاسمة.
دخلت إليها أمها بعد لحظات، وعيناها لا تخفيان الدهشة والسعادة: سمعتي اللي قاله يا شهد؟ الراجل جه يطلبك، إيه رأيك؟
رفعت شهد يديها لتمسح دموعها بعصبية، وقالت بنبرة مفعمة الحزن: رأيي في إيه يا ماما؟! هو عاوز يتجوزني عشان يسكت السنة الناس عني! شايفني مسكينة محتاجة راجل ينقذها… مش شايفني ست تستاهل يحبها
اقتربت سندس منها، أمسكت بيديها وأجبرتها أن تنظر في عينيها قائلة بصدق: بصي يا بنتي… جلال راجل جدع وابن حلال مصفي، وهيحطك ف عنيه، حتي لو مش بيحبك زي مابتقولي أنتي بشطارتك وبطيبتك تقدري تخليه يحبك…
انكمشت شهد بين ذراعي أمها، وبداخلها صراع مرير بين كرامتها الجريحة وقلبها العاشق الذي لا يعرف إلا جلال، دموعها لم تجف، لكن حين أغمضت عينيها، ارتسم وجهه في مخيلتها بصلابته وخطوط الغضب في ملامحه.
