المدير التنفيذي حكايات اسما
سيف بص في عينيّ بهدوء وقال:
“لأنك الوحيدة اللي أثق فيها.”
ماعرفتش أرد.
كنت واقفة ماسكة العقد، وإيدي بتترعش.
أنا؟
عاملة النظافة؟
أبقى المساعدة الشخصية لرئيس أكبر شركة في البلد؟
أكيد فيه حاجة غلط.
قلت بتردد:
“حضرتك… يمكن تقصد حد تاني.”
ابتسم ابتسامة خفيفة لأول مرة.
وقال:
“أنا عمري ما بغلط في الأسماء.”
خرج من المكتب، وسابني واقفة مكاني.
الموظفين كانوا بيبصوا لي بنظرات غريبة.
فيه اللي مستغرب.
وفيه اللي غيران.
وفيه اللي بدأ يهمس.
“أكيد بينهم حاجة.”
“هو يعرفها من زمان.”
“مستحيل ينقلها كده فجأة.”
كنت سامعاهم.
لكن كنت أضعف من إني أرد.
…
بعد ساعتين، دخلت مكتبه الجديد لأول مرة كمساعدة.
المكتب كان أكبر من شقتنا كلها.
شبابيك زجاجية بطول الحيطة.
مكتبة خشب فخم.
وصور لنجاحات الشركة.
حط قدامي ملف.
وقال:
“اقعدي.”
قعدت وأنا متوترة.
فتح الملف.
طلع منه تقرير طبي.
أول ما بصيت على الاسم…
قلبي وقف.
الاسم كان…
“نجلاء عبدالرحمن.”
اسم أمي.
رفعت عيني بسرعة.
قلت:
“إزاي التقرير ده عند حضرتك؟”
قال:
“من أسبوع.”
شهقت.
“مين اداهولك؟”
قال بهدوء:
“الدكتور اللي بيعالجها.”
قمت واقفة.
“حضرتك بتراقبنا؟”
رفع إيده بهدوء.
“اسمعيني الأول.”
لكن أعصابي كانت خلاص انهارت.
“أنا ست غلبانة يا بيه… لو فيه مشكلة قولها… لكن متدخلش في حياة أمي.”
سكت شوية.
وبعدين قال:
“أنا بدفع تمن علاجها من شهر.”
الكلمة وقعت عليّ كالصاعقة.
“إيه؟!”
“كل جلسة علاج… وكل دواء… اتدفع.”
افتكرت الفواتير اللي المستشفى قالت إنها اتسددت فجأة.
وافتكرت إن المحاسب قال:
“فيه متبرع رفض يقول اسمه.”
عمري ما تخيلت…
إن المتبرع ده…
يبقى سيف الحديدي بنفسه.
دموعي نزلت.
قلت:
“ليه؟”
بص ناحية الشباك.
وقال بصوت منخفض:
“لأن عندي دين قديم لازم أوفيه.”
…
خرجت من عنده وأنا دماغي هتنفجر.
رجعت البيت.
لقيت أمي قاعدة على الكنبة.
وشها بقى أحسن من زمان.
أول ما شافتني قالت:
“مالك يا ليلى؟”
قعدت جنبها.
وسألتها:
“إنتِ تعرفي سيف الحديدي؟”
اللون اختفى من وشها.
إيديها بدأت ترتعش.
الكوباية وقعت من إيديها واتكسرت.
بصتلي بخوف عمرى ما شوفته قبل كده.
وقالت:
“مين قالك الاسم ده؟”
عرفت وقتها…
إن أمي فعلاً تعرفه.
لكن كانت مخبية الحقيقة طول السنين.
فضلت أضغط عليها.
لكنها رفضت تتكلم.
كل اللي قالته:
“ابعدي عنه.”
