ملك كانت بنت بسيطه

ملك كانت بنت بسيطة اوي من منطقة شعبية على قد حالها في حارة ضيقة في شبرا، ابوها مات وهي عندها عشر سنين وسابها هي وامها حنين ست كبيرة عندها القلب ومحتاجة علاج كل شهر بمبلغ كبير ومتابعة عند دكتور غالي، ملك مكانتش لسه متخرجة من كلية التجارة بقالها سنة واحدة بس وكانت بتدور على اي شغل حلال عشان تقدر تصرف على البيت وتجيب علاج امها وتدفع ايجار الاوضة اللي قاعدين فيها، لفت كتير وقدمت في شركات كتير ومحدش كان بيرضى يشغلها عشان معندهاش خبرة، لحد ما ربنا كرمها واشتغلت سكرتيرة في شركة كبيرة اوي في وسط البلد بتاعة استيراد وتصدير، الشركة دي بتاعة واحد اسمه كنان بيه، شاب عنده تلاتين سنة وورث الشركة من ابوه بعد ما مات وعنده فلوس وعربيات وفلل كتير اوي بس مغرور لابعد حد وطريقته وحشة جدا مع كل الناس اللي حواليه، الكل في الشركة كان بيخاف منه وبيعمل له الف حساب ومحدش كان يقدر يبص في وشه لما يتعصب.

اول يوم دخلت فيه ملك الشركة كانت لابسة طقم بسيط جدا جايباه من الوكالة وكانت متوترة اوي، ريناد صاحبتها اللي شغالة معاها في قسم خدمة العملاء هي اللي عرفتها على المكان، ريناد بنت جدعة وطيبة وقالت لها بصي يا ملك الراجل ده صعب اوي اوعي تاخدي كلامه على صدرك هو بيزعق لكل الناس ومبيحترمش حد، بس انتي استحملي عشان المرتب هنا كويس وهيساعدك في علاج امك، ملك ضحكت بوجع وقالت لها انا جاية اشتغل وبس مش جاية اتدلع، انا ورايا مسؤولية كبيرة ومش فاضية للمشاكل، انا امي لو ماخدتش الدوا كل يوم ممكن تروح مني في اي لحظة، وفعلا بدأت شغلها وكانت ملتزمة جدا بتيجي بدري قبل كل الناس وتمشي متأخر بعد ما تخلص كل الشغل اللي وراها وبتعمل كل حاجة بتتطلب منها على اكمل وجه وبمنتهى الامانة.

بس كنان كان كل يوم بيطلع فيها القطط الفطسانة كأنه مستني لها على غلطة، يدخل المكتب الصبح مكشر ولابس بدلة غالية ويقول لها فين القهوة اتأخرتي ليه، تقوله حضرتك القهوة جاهزة من بدري على مكتبك يقول لها لا باردة زي وشك اعملي واحدة غيرها، تجيب واحدة غيرها يقول لها انتي مش مركزة خالص انتي فاكرة نفسك فين في بيتكم، ويفضل يهزأها قدام العملاء وقدام الموظفين وهي ساكتة ومش بترد عشان محتاجة الشغل ولو سابته مش هتلاقي تمن علاج امها، وفي مرة طلب منها تترجم ملف انجليزي كبير في ساعة واحدة بس وده مستحيل، ولما قالت له حضرتك الملف كبير محتاج وقت اكتر، قال لها انتي فاشلة ومبتفهميش حاجة انا مش عارف انا مشغلك هنا ازاي، ملك دخلت الحمام وفضلت تعيط لوحدها من القهر بس مسحت دموعها ورجعت كملت شغلها.