حكايه فيروز وزين
— يلا نروح يا أبيه… أنا تعبانة.
زين رفع عينه وبصلها، لاحظ الضيق في وشها، الاحمرار الخفيف في عنيها…
بس ما اتكلمش.
ولا حاول يفسّر، ولا يوضح، ولا حتى يدافع.
قام بهدوء، دفع الكرسي، ومشي جنبها من غير كلمة.
خرجوا، ركبوا العربية،
والصمت كان تقيل…
تقيل لدرجة إنه كان بيوجع.
الطريق عدى ببطء.
لا هو اتكلم، ولا هي سألت.
كل واحد فيهم غرقان في أفكاره.
قدّام البيت، فيروز نزلت بسرعة.
— تصبح على خير.
طلعت أوضتها من غير ما تبص وراها.
زين فضل واقف شوية، متابع ضيقها بعينيه،
ساكت…
وسكوته كان غلط، بس هو ما كانش شايف غير خوفه.
—
يوم جديد بدأ.
زين صحى بدري، نزل، لقى فيروز قاعدة مع مامته، جاهزة تروح الجامعة.
أول ما شافته، وقفت.
ملامحها ثابتة، هادية زيادة عن اللزوم.
بصّت له وقالت بكل ثبات:
— أنا موافقة على العريس اللي متقدم لي يا أبيه.
وسكتت ثانية وبعدين كملت:
— ياريت تحدد له ميعاد عشان ييجي هو وأهله يخطبوني.
الكلام طلع منها سريع، كأنه محضّر.
ومستنتش رد.
لفّت ومشيت بسرعة،
خايفة تشوف رد فعله…
أو يمكن خايفة تضعف.
زين وقف مكانه.
الكلمة لفّت في ودنه: موافقة.
حس بحاجة اتكسرت جواه.
أمه بصّت له بهدوء مستفز:
— هتعمل إيه يا زين؟
انفجر.
— يعني الهانم موافقة على العريس وعايزة تتجوز؟
ضحك ضحكة قصيرة مالهاش طعم:
— وماله… تتجوز.
أمه عقدت حواجبها:
— تقصد إيه؟
بس هو ما ردّش.
لفّ، خد مفاتيحه، وخرج وهو متعصب،
الباب اتقفل وراه بقوة.
وأمه فضلت واقفة،
عارفة إن النار ولعت،
وإن الصمت اللي زين اختاره…
وصلهم للحظة دي.
—
الليل كان تقيل، والبيت ساكت على غير العادة.
الساعة عدّت، وزين لسه مرجعش… وده مش طبعه.
فيروز كانت في أوضتها، قاعدة على السرير، قلبها مقبوض.
قامت ووقفت في البلكونة، بتبص عالشارع كل شوية.
وفجأة…
عربيته ظهرت قدّام البيت.
وقفت مكانها، عنيها متسمّرة عليه وهو بينزل.
مش طبيعي.
مش زين اللي تعرفه.
دخل البيت، وفيروز خرجت من أوضتها ووقفت عند الباب تستناه.
قلبها بيدق بسرعة.
زين طلع السلم، خطواته تقيلة، جسمه مش متزن…
ريحة الشرب سبقته.
أول مرة تشوفه كده.
وقفت قدامه بخضة، وصوتها طلع رقيق وخايف:
