كاميليا سوما العربي 2

صحت على الفراش مستوية وها قد عادت تواجه واقعها تسأل كيف ستتصرف ومع صوت الأذان قفز لعقلها صورة زياد إبن عمها وكيف بدى متعاون ومنفتح عليها ويود التعرف عليها ويعاملها برحابه عكس معاملته لشقيقتها.

هل من الممكن أن يساعدها؟! فكرت للحظات قبلما تهمس (هقوم اصلي، ربنا هيقبلني حتى لو مقصرة، ربنا رب قلوب)

توضأت فأحسنت ثم وقفت تصلي بخشوع، وقتها تقاذفت على عقلها الذكريات، تعنيف عبد الله، غمزات النساء اللاتي كن يعرفانه وكيف قللوا منها وهو فعل معهن، تركها لوحيدها آدم وإشتيقاها الشديد له وخوفها عليه ثم دخولها بموافقتها لتلك الخطة الحقيرة التي وضعتها شقيقتها وصولاً لعثمان ومطاردته لها وغدر ليلى بها فبكت بحرقة وانخرطت في البكاء، سجدت وأطالت في السجود وهي تسأل سؤال واحد”يارب أنا غلطانة وندمانة بس اعمل ايه؟؟ أعمل ايه؟! هعمل ايه دلوقتى وهروح فين واتصرف ازاي؟ اعمل ايه؟ اعمل ايه؟”

ظلت تبكي وتبكي وتبكي حتى انهت صلاتها وسلمت، جلست مكانها وحدة بكاءها تتوقف تدريجياً.

عضّت شفتيها وهي تفكر ثم عادت تهاتف ليلى التي جاوبتها على الفور:
-بتقفلي الموبايل في وشي تاني؟! هو انتي ليه مش عايزة تسمعي وتفهمي وتمشي ورا كلامي مره انا عايزة مصلحتك….
لتقاطعها كاميليا تتحدث بحسم شخص عارف وجهته وكيف سيتصرف:
-أنا عايزة رقم زياد.
-نعم؟! زياد؟! ليه؟!
-هتديهولي ولا هتستندلي معايا تاني؟!
-تاني؟؟ هفضل أفهمك لأمتى؟ يابنتي والله انا بس عايزة…

قاطعتها مجدداً:
-خلصي يا ليلى معاكي رقم زياد؟!
-معايا بس مش هديهولك.

بهت وجه كاميليا وهي حقاً مشدوهة من ندالة شقيقتها ألا يكفي تمريرها أكل حقها لتكمل سلسلة خزلانها؟!

لكن ليلى تحدثت تقول:
-قبل ما تتصدمي وتقولي تاني بتخلى عنك وشغل العيال الصغيرة ده، أنا مش هديكي رقم زياد وماترحيلوش يا كاميليا انا بحذرك، عثمان غضبه وحش ، راجل زي عثمان لو حب وغار هيولع فيكي انتي والي استنجدتي بيه، لو عايزه خدمة اطلبيها من عثمان، واضح انه واقع فيكي لدرجة لو طلبتي عين من عيونه هيوافق إسمعي مني بلاش تلعبي بالنار وتستنجدي بأي راجل غيره.
-وانا مش هزود غلطي ، مش كفايه وهمته اني عيني منه وانا مش بطيقه، كمان هروح امصلح عليه في خدمات وفلوس عشان ساعتها يشرب من دمي بجد، انا بحاول أملص من الحوار وابعد شوية بشويه قبل ما اغرز زيادة وانتي عايزاني أمصلح عليه؟! أقولك..انتي مش غلطانة ، والله ما غلطانه، انتي ماضربتنيش على إيدي انا الي وافقت وكمان نفذت وأستاهل كل الرعب الي أنا فيه وغلطانه عشان لسه عندي أمل فيكي وبكلمك أنا هتحمل غلطتي لوحدي مش عايزة منك حاجة.