فتاه الثلاثون بقلم هند ايهاب

||فتاة الثلاثون عام_الجُزء الأول|| – وبعدين يا هند، هتفضلي كده لحد أمتي، قافله علي نفسك ورافضه الجواز، وكأنك لسه صغيره بصيت لأُمي اللي كانت واقفه علي الباب وقولت: – وأيه المانع لما أشوف نفسي صُغيره، السن عُمره ما كان عائق في حياة أي حد – بس مش مع البنات، البنت لو عدت سن مُعين بيتقال عليها بايره، حابه القطر يفوتك ابتسمت برضا وقولت: – يفوتني أحسن ما يدوس عليّ ويقطع\ني ميت حته، أيه يا أُمي، تحبي أتجوز أي واحد يخبط علي الباب عشان بس كلام الناس، ولما الشخص ده يطلع الشخص الغلط وأرجعلك مُطلقه، كلام الناس ساعتها هيفيد بأيه قعدت وقالت: – مش هيفيد، بس ده حتي أنتِ رافضه تشوفي ولا حتي تقعُدي، يا بنتي ده أنتِ لسالك كام شهر وتتمي الـ 30 سنه اتنهدت وقولت: – كُل واحد مكتوبله هيتجوز أمتي، وأنا راضيه حتي لو فضلت للأربعين، ربنا ما بينساش حد اتنهدت من الكلام اللي لا بيقدم ولا بيأخر وقامت طلعت بهدوء، مش أول مره تكلمني في الموضوع ده، وعارفه أنه مش أخر مره، بس كُل الحكايه أني عايزه أحب وأتحب، مش عايزه أخوض التجرُبه مع شخص أنا مش ضامنه وجوده معايّ قومت فتحت اللابتوب وكالعاده بقلب في الفيس، أستوقفني بو\ست كانت واحده بتحكي موقف حصل معاها، ومن ضُمن البو\ست، مكتوب أن الشخص بيقولها، أقعُدي في البيت، البنت ملهاش غير البيت وأنها تخدم رجالتها فقط لا غير، مين أنتِ عشان تنزلي تشتغلي، شايفه نفسك مين عشان يكونلك كيان للحظه أتعصبت، دخلت الكومنتس، مُعظم اللي فيه رجاله بتهاجم البنت، وبيأيدوا الشخص اللي قال الكلام ده، بس كان من ضمنهُم شخص، كان بيهاجمهُم وبيهاجم الشخص اللي لا يُذكُر شئ من الرجوله، كان كلامه منطقي وجميل، وأن البنت من حقها يكونلها حياه، من حقها تنزل وتشتغل لو هي حابه ده، من حقها تدرس وتعيش حياتها زي أي حد لقيت أيدي بتروح ناحية الكيبورد وبكتب: – البنت لو مكنتش موجوده مكنش الراجل بقا موجود، ربنا خلق كُل واحد فينا ليه أعمال وواجبات، أه البنت مُمكن تقعُد في البيت تشوف واجباتها في البيت بس ده ميمنعش أنها تقفل حياتها عشان خاطر عقول ناس مريضه، وكمان يعني أيه شايفه نفسك مين!!، كُل واحد بيحب يثبت نفسه بنفسه، وأحيانًا مُعظم الرجاله بتخاف من نجاح الست، لأن طول ما الست بتنجح في شُغلها كُل ما أحتياجها للراجل بيقل، مع أن عادي، سواء الست أشتغلت أو لاء فهيفضل أحتياجها للراجل موجود فملهوش علاقه بالشُغل دوست أرسال وقومت عملت نيسكافيه، رجعت الأوضه والمج في أيدي، قعدت ولقيت في رد علي الكومنت، بأسم الشخص اللي كتب كومنت عجبني، كان مبهور بالكومنت بتاعي، وبعد ثواني كان بعت لي علي الخاص – بصراحه كلامك حلو وعجبني رفعت حواجبي بزهول وابتسامه خفيفه وكتبت: – كان لازم أرُد وخصوصًا أن كلامك شجعني – الحقيقه أني مش بحب الرجاله اللي من النوع ده فكان لازم أتكلم، أنا شايف أن الست ليها حياه زيها زينا، آه متقدرش تعمل حاجات كتيره من اللي بنعملها وكذلك أحنا كمان منقدرش بس علي الأقل ليها حياتها ابتسمت لكلامه وكتبت: – كلامك جميل أوي يا تميم وبجد صعب نلاقي دلوقتي حد مُتفهم زيك كده – والله فيه كتير بس النوعيه دي طاغيه عليهُم ضحكت وقعدنا نتكلم كتير أوي، كُنا بنتكلم ونهزر كأننا صُحاب ونعرف بعض، كُنا أخدين علي بعض أوي #أسميته_تميم #هند_إيهاب||فتاة الثلاثون عام_الجُزء الثاني|| فضلت سهرانه بتكلم معاه، عرفت عنه حاجات كتيره، سنه، شُغله، مكانه، آه هو معايّ في نفس البلد كمان، وأنا كمان حكيت له عني، حكيت له عن كُل حاجه، بحس براحه وأنا بتكلم من ورا الشاشه، مبحسش بتوتُر دخلت حسابه وفضلت أتفرج علي الصور، كان شيك أوي في لبسه وتسريحة شعره اللي لايقه عليه ودقنه الخفيفه، وطلعة الحُسن اللي دقنه بتحاول تخبيها، كُنت مقربه الصوره عشان أقدر أشوف ملامح وشه كُلها وصلت لي مسدچ منه وكان عايز رقمي، كان حابب نتكلم، منه للحظه أتوترت، لأن زي مقولت بحس براحه وأنا بتكلم من ورا الشاشه وبعد مُحايله منه كتير، بعت رقمي بعد كام دقيقه وقولت: – خلينا نجرب مش يمكن ترتاحي أكتر في الكلام بعد دقيقه لقيت تليفوني بيرن برقم غريب، رديت وأول ما سمعت صوته حسيت برعشه جوايّ كده، حمحمت بعد مفضل يعيد في كلمة الو كذا مره – الو – صوتك حلو أهو أُمال ليه مش عايزه نتكلم بتوتُر قولت: – لاء بس أنا مش متعوده – أممم، يعني دي أول مره – آه – دي حاجه حلوه أن أول مره تبقي معايّ أنا ابتسمت وقولت: – بس ليه أتحايلت أننا نتكلم – حابب نتكلم، كُنت حابب أسمع صوتك، مهو مش هنفضل طول حياتنا بنتكلم من ورا الشاشه كده، لازم ناخُد خطوه تانيه وبعد التانيه يبقي فيه تالته بتساؤل قولت: – وأيه هي التالته – نشوف بعض مثلًا ضحكت وقولت: – أكيد بتهزر صح ضحك وقال: – لاء بتكلم بجد، أنتِ خايفه من أيه – مش حكاية خوف، أنا في سني ده معملتهاش ولا مره، أتقابل مع واحد ونقعُد ونتكلم قُدام الناس كُلها كده – وأيه المُشكله، مُشكلتك الناس!! سكت وقولت: – لاء أنا الناس أخر همي – يبقي نتقابل ونعمل اللي أحنا عاوزينه – يعني هنعمل أيه مثلًا – نتجنن مثلًا ابتسمت وقولت: – نتجنن مره واحده – وأيه المُشكله، دي هي الحياه مره واحده بس، لو معرفتيش تعملي كُل اللي نفسك فيه، يبقي خلاص كده، وكُله في الحدود طبعًا – آه أكيد، كلامك صح سكت وقال: – ها بقا أمتي وفين ضحكت وقولت: – أيه الأستعجال ده – عايزه الصراحه – أكيد طبعًا هو في أحلي من الصراحه – عايز أشوفك سكت حسيت بأبتسامه أترسمت علي شفايفي، حسيت أن وشي أحمر من الأحراج معرفتش أرُد وأقول أيه، لقيت نفسي بقول: – خلاص شوف اللي أنتَ عاوزه – ايه رأيك يبقي النهارده، نعمل ديت بقا وكده، نروح مطعم ونقعُد قاعده حلوه وبعدين نعمل حاجات كتيره أوي بقا ضحكت وقولت: – أيه الحماس ده ضحك وقال: – دي حقيقه أنا مُتحمس فعلًا – خلاص يا سيدي ماشي – أبعتي لي اللوكيشن بتاعك وأنا هجيلك – لالا أنا هجيلك – ليه – عادي سكت وبعدين قال: – ماشي هسيبك علي راحتك المره دي بس ابتسمت وعرفت أسم المطعم وقفلت عشان أستعد لأول ديت معاه، كُنت مُتحمسه، قومت وفضلت واقفه قُدام الدولاب، كُنت محتاره ألبس أيه، طلعت طقمين وروحت ناحية المرايّ، فضلت أحطهُم عليّ لحد ما أستقريت علي واحد منهُم، علقته برا الدولاب ودخلت خدت دُش دافي، دخلت المطبخ عملت فنجان قهوه يخليني مصحصحه كده، وعملت سندوتش توست أفطر بيه، أكلت وبدأت أشرب القهوه، كُنت مع كُل بُق باخده كُنت بشم ريحتها اللي بتخطفني لعالم تاني، بحب القهوه، بحب ريحتها، بحب لونها، بحب كُل حاجه خاصه بالقهوه، فضلت قاعده قُدام شاشة التليفزيون، فاتحه كرتون، مش معني أني كبرت وداخله علي التلاتين يبقي خلاص كده، كُل مهكبر كُل ما حُبي للكرتون بيكبر معايّ، قومت روقت أوضتي وغيرت شوية حاجات فيها وولعت بخور بعد ما قفلت الشباك اللي فتحته عشان الشمس تدخُل الأوضه وتطرُد كُل الطاقه السلبيه اللي في الأوضه، وبعد ما خلصت وأجا الوقت اللي هقوم ألبس فيه قومت لبست الطقم اللي طلعته ولبسه كوتشي أبيض وحطيت حاجات خفيفه خالص، أيلاينر ومسكره وروج باللون البني الخفيف، طبعت بو\سه علي أيدي وطيرتها ناحية المرايّ اللي شايفه نفسي فيها، نزلت وركبت الأوبر اللي طلبته، وصلت المطعم ودخلت بكُل ثقه، عكس طبعًا اللي جوايّ، بصيت حواليّ بعشوائيه، لحد ما عيوني وقعت علي شخص شيك أوي، كان بيبُص لي، باين أنه بقاله كتير بيبُص ناحية الباب كان بيضيق عينيه ولما شافني فضلت بصاله ابتسم وعقد حواجبه، ابتسمت وروحت ناحيته، قام وقف وقال: – هند بصيت علي أيدي اللي بتفرُك في الشنطه وهزيت راسي، مسك الكُرسي عشان أقعُد، حركه لطيفه مش شخص لطيف، قعد قُدامي وفضل يلف حوالين نفسه، كان متوتر شويه بعكسي تمامًا، كُنت حاسه نفسي بسيح زي الايسكريم من التوتُر بصينا لبعض وفي نفس واحد قولنا: – أيه!! ضحكنا وبعدنا عيونا عن بعض وقال: – مكُنتش مُتخيلك كده – كده اللي هو أزاي!! بص لي وهو مركز في عيوني وقال بتوهان: – حلوه، أو يعني عيونك حلوين، خطفوني #أسميته_تميم #هند_إيهاب||فتاة الثلاثون عام_الجُزء الثالث|| بصيت في الأرض مع ابتسامه خفيفه ممزوجه بأحراج، نادي علي الويتر وقال: – تحبي تاكلي أيه أخدت المنيو من الويتر وقولت: – مش عارفه – حابب أكُل حاجه علي ذوقك – مُمكن ميعجبكش – مظُنش فضلت أقلب في المنيو وقولت: – مُمكن أطلُب نجريسكوا بالفراخ ابتسم ومد أيديه للويتر بالمنيو وقال: – أتنين نجريسكوا بالفراخ الويتر مشي وقولت: – كان المفروض تطلُب ليك حاجه علي ذوقك – حابب المره دي أكُل علي ذوقك وكمان أنا عايز أجرب حاجه مُختلفه سكت وبعد دقايق كان الأكل نزل، بدأنا ناكُل وأحنا مُستمتعين بالأكله، وبعد ما خلصنا، طلب الحساب وطلعنا، فضلنا نتمشي كتير أوي، كان الجو هادي، مكنش فيه حد حوالينا، فجأه في وسط الشارع نام علي الأرض – أنتَ بتعمل أيه – أوقات كتيره بحب أعمل كده، بيبقي القمر قُدامي، بحب أفضل أبُص له كده بصيت في السما وقولت: – بس القمر مش هنا بص لي وقال: – أُمال أنتِ بتعملي أيه ضحكت بأحراج ولقيت نفسي بنام علي الأرض ولقيته طلع التليفون وفتح الساوند وشغل أُغنية لـ أحمد فوزي، ” وأنا جنبك وعينيك في عينيا بشتقلك يا أرق ملاك، تسلملي ويخليك ليا ياللي لقيت أحلامي معاك ” لقيته بيبُص لي وأيديه بتلمس أيدي وبيغني مع الأُغنيه: – صدقني من أول مره أنا شوفتك ولمست أيدك، خلتني فكرت في بُكره وأزاي بس أكون حواليك أبتسمت وقولت: – صوتك حلو أوي ضحك وقال: – أقل حاجه عندي بتساؤل كمل: – هو أنا عايز أسألك سؤال بصيت له وقال: – هو أنتِ ليه متجوزتيش لحد دلوقتي بصيت في السما وقولت: – مش حابه جو الصالونات، أنا دايمًا بحلم أني أحب وأتحب، عايزه أكون مع شخص يفهمني ويقدر يحتويني، شخص عارف كُل حاجه عني، شخص بيثق فيّ، حابه أتجوز عن حُب عشان اما تحصل مُشكله بيني وبينه أهدي عشان بحبه، أقعُد في بيتي وأحتوي الموقف، مش أقعُد عشان خاطر العيال، أقعُد عشان الحُب اللي بينا بصيت له وقولت: – ولا أنتَ رأيك أيه!! – عندك حق في كُل كلمه، أنا برضو بدور علي الحُب ابتسمت وقولت: – أهلي مفكرين أني عايزه أقعُد جمبهُم بسبب رفضي للعرسان، بس أنا رفضي ليهُم بسبب أن كُل اللي بيجي صالونات – يعني لو حبيتي حد وحد حبك معندكيش مانع – أكيد معنديش مانع، واحد وبحبه وهو بيحبني أيه اللي هيخليني أرفُض ابتسم وقعد وربع رجليه وقال: – عايزه شكل مُعين في شريك حياتك قعدت وقولت: – الشكل مش كُل حاجه، ميهمنيش شكله قد ما يهمني شخصيته، عصبي وفي نفس الوقت حنين، مهما كان صعب مع الناس بس معايّ يكون لين، يخاف عليّ من الهوا، كلمته واحده، ميهمهوش حد، واللي يقوله هو اللي هيحصل ابتسم وقولت: – ها بقا وأنتَ فضل يتأمل فيّ دقيقه وقال: – عايزها زيك ضحكت وقولت: – صعب، هتتعب في شخصيتي – بالعكس بقا، أنا شايف أني أقدر أفهم شخصيتك كويس أوي، حاسس أن جواكي طفله، مهما كبر سنها، هي زي مهي مبتتغيرش ابتسمت وقومت وقفت وقولت: – طب مش يلا بقا، الوقت أتأخر أوي – بتهربي!! حاسس أني أتكلمت عنك بكُل صراحه، حاسس أنك مبتحاوليش تبيني أنك طفله مثلًا – صدقني مبتحرجش، أنا بحب دايمًا أكون طفله، بحس أن السن رقم مالوش معني، هو مُجرد رقم بس قام وقف وقال: – هو فعلًا مُجرد رقم بس كُنا لسه هنمشي بس وقفنا صوت حد بينادي عليّ بيزعيق وعصبيه، كان بابا، فجأه بصيت له بخوف أجا عليّ من بعيد وهو متعصب وقال: – أنتِ بتعملي أيه هنا، ومين ده بصيت لتميم وقولت بخوف: – بابا لقيت أيديه بتترفع عليّ بس كان تميم ماسكها وقال: – حضرتك فاهم غلط، مُمكن تديني فُرصه أشرحلك بزعيق قال: – عشان كده رافضه العرسان، عشان كده عايزه تمشي علي حل شعرك – حضرتك مينفعش تقول كده، دي بنتك وأكيد عارف أنها متعملش حاجه غلط مسكني من أيدي جامد وشدني ناحيته وقال: – أنا غلطان أني وثقت فيكي تميم بغضب مكتوم من مسكته ليّ وقال: – مُمكن أتكلم مع حضرتك في كلمتين علي جمب بص لي وزقني وهو بيسيب أيدي ومشي بعيد مع تميم، مسكت معصم أيدي وأنا بتوجع وبعد شويه قرب مني وقال بهدوء: – قُدامي علي البيت بصيت لتميم ولقيته بيهز راسه بهدوء وكأنه بيطمني بعيونه، فضلت طول الطريق ساكته، خايفه، بابا كان ماشي هادي بعكس اللي حصل من شويه، وصلت البيت – بابا – ليه مقولتليش عقدت حواجبي وقولت: – علي أيه!! – أن في واحد عايز يتقدملك عيني وسعت وقولت: – أيه!! – ليه خايفه من الجواز، كُنتي قوليلي، قوليلي يا بابا في واحد عايز يتعرف عليّ، كُنت ساعتها هجيبه وهشوفه وساعتها تتعرفوا علي بعض قُدامنا – يا بابا، دي أول مره أعملها – عارف، تميم حكالي، وقالي أنه هيجي بُكره عشان يشرب معايّ الشاي، حضري نفسك لبُكره دخل الأوضه وسابني، فتحت تليفوني وبعت له مسدچ، وأول ما دخلت الأوضه كانت وصلت لي مسدچ منه – محبتش تتحطي في موقف وحش – تقوم تدبس نفسك – عايزه الصراحه عقدت حواجبي وقولت: – أكيد – دي هتبقي أحلي تدبيسه في حياتي #أسميته_تميم #هند_إيهاب||فتاة الثلاثون عام_الجُزء الرابع والأخير|| صحيت من النوم وأنا متوتره وفي نفس الوقت حاسه بحاجه غريبه، لقيت ماما بتفتح الباب وهي مبسوطه ومُتحمسه، مهي طول عُمرها بتحلم باليوم ده – أنتِ لسه قاعده يلا قومي راحت ناحية الدولاب وبقت تطلع الدريسات كُلها اللي تنفع مُناسبات، فضلت تتفرج علي كُل واحد شويه لحد ما أختارت الأبيض – قري الفاتحه مع فُستان أبيض هيبقي عسل أوي – خلاص خلتيها قري فاتحه سابت الدريس وأجت قعدت قُدامي وقالت: – عارفه يا هند لو رفضتي لا تبقي بنتي ولا عايزه أعرفك ضحكت وقولت: – لاء مش هرفُض بس ما يمكن النهارده تعارف بس مش قري فاتحه – لا أن شاء الله هيبقي قري فاتحه، علي الأقل تقدروا تتعرفوا علي بعض أكتر وبكُل أرياحيه سكت وقالت: – ليه مقولتليش أن في حد، ليه خبيتي عليّ وأنا أكتر واحده تفرح – يا ماما صدقيني أتعرفت عليه صُدفه ودي كانت أول مُقابله تحصل بينا هزت راسها وقالت: – طب قومي يلا خُدي دُش وتعالي عشان تاكلي يلا عشان تجهزي قومت وأنا برقُص وقولت: – هي العروسه والليله ليلتها، سيبوها تدلع علي راحتها شغلت السماعات وبدأت أجهز لليوم، كُنت حاسه أني مبسوطه، حاسه أني ببدأ حياه حلوه، لبست الدريس الأبيض والهيلز البيضه، حطيت ميكب خفيف أول ما سمعت جرس الباب بيرن، أتنفضت، حاسه أني قلبي أتحرك من مكانه، نسبة الحماس عندي عِلت، لقيت ماما داخله عليّ وهي مبسوطه – بت يا هند، أيه القمر اللي أنتِ جايباه ده ضحكت وقولت: – عشان تعرفي بس أخرت اللي بيصبُر بينول طلعت من الأوضه معاها وأحنا بنضحك، شيلت الصينيه وطلعت، كان هو ومامته وباباه وأخته، أول ما طلعت مامته زغرطت، قام وقف وحطيت الصينيه علي التربيزه ومدلي أيديه بالبوكيه وبعد سلام\ات وأحضان من مامته وأخته، باباه طلب أيدي وبابا وافق لما شاف لمعه في عيوني، لبسنا الدبل وأخته صورتنا صورة قري الفاتحه، كُنت واقفه وحاضنه البوكيه ورافعه أيدي اليمين برقم خمسه، وهو كان واقف جمبي رافع أيديه اليمين وقافلها وكأني أعظم أنتصاراته تمت.. #أسميته_تميم #هند_إيهاب