الجريمه وبائع الورد حكاوي ديدا الشهاوي
رماها في وش كريم وجري ناحية آخر الشارع.
كريم حضن الشنطة بسرعة وقام يجري يرجع.
كان نفسه بيقطع ورجليه واجعاه لكن فضل يجري.
لما وصل كانت الست الكبيرة قاعدة على الرصيف بتعيط.
أول ما شافته حضنت الشنطة وهي بتبكي.
يا ضنايا… ربنا يحفظك.
الناس بدأت تسقف للولد.
واحد قال
والله راجل.
واحد تاني قال
الواد ده أشجع من رجالة كتير.
أما الراجل الغني فكان واقف بعيد بيتفرج عليه من غير ما ينطق.
الست الكبيرة فتحت الشنطة بسرعة.
كان فيها مبلغ كبير من الفلوس وأوراق مهمة.
حضنت كريم وقالت
إنت أنقذتني يا ابني.
طلعِت ألف جنيه ومدتهمله.
خدهم.
بص كريم للفلوس وسكت.
قالت له
خدهم يا حبيبي دول حقك.
لكن كريم رجع خطوة لورا وقال
لا يا طنط.
استغربت.
ليه؟
أنا معملتش كده عشان الفلوس.
أنا كنت هزعل لو حد خد حاجة منك.
قالت وهي مصممة
بس لازم تاخدهم.
ابتسم كريم وقال
لو عايزة تساعديني اشتري مني وردة.
وبس.
سكتت الست لحظة وهي حاسة إن دموعها هتنزل.
قالت
بكام؟
بعشرين جنيه.
قالت
هات كل اللي معاك.
بص كريم للجردل.
كان فاضل سبع وردات.
ناولهم لها.
طلعت ميتين جنيه بس هو رجعلها باقي الفلوس.
قالت بدهشة
إيه ده؟
إنت رجعتلي الباقي؟
أيوه.
أنا قولت الوردة بعشرين.
مش أكتر.
بصت له وهي مش مصدقة.
الراجل الغني كان واقف سامع كل كلمة.
قرب منهم أخيرًا وقال للست
حضرتك تعرفيه؟
هزت رأسها.
لأ.
أول مرة أشوفه.
بص الراجل لكريم وقال
اسمك إيه؟
كريم.
ساكن فين؟
في بولاق.
مين في البيت؟
أنا وأمي.
وسكت.
سأله الراجل
بتبيع ورد كل يوم؟
أيوه.
من بعد المدرسة؟
كريم نزل عينه وقال
بطلت مدرسة من سنة.
ليه؟
عشان أصرف على أمي.
الكلمة دي وقعت على قلب الراجل كأنها حجر.
فضل ساكت شوية.
وبعدين قال
العلاج بكام؟
أربعمية وخمسين.
طلع الراجل محفظته.
لكن قبل ما يدي له الفلوس.
رن تليفونه.
رد بسرعة.
كان المتصل مدير شركته.
يا فندم الحق بسرعة.
المصنع ولع.
وشه اتغير.
لف لكريم وقال
استناني دقيقة.
وجري ناحية عربيته.
ركب وانطلق بسرعة.
فضل كريم واقف مكانه.
بص للطريق.
استناه.
دقيقة.
واتنين.
وعشرة.
لكن العربية ما رجعتش.
ابتسم ابتسامة كلها وجع وقال لنفسه
أكيد نسي.
بص للفلوس اللي معاه.
لسه ناقصه مية وعشرة جنيه.
بص للسماء.
المطر بقى أغزر.
والصيدلية هتقفل بعد ربع ساعة.
لو مقفلتش قبل ما يوصل.
جري بأقصى سرعة ناحية الصيدلية.
دخل وهو بينهج.
لو سمحت… الدوا ده.
