الجريمه وبائع الورد حكاوي ديدا الشهاوي
قالت
هات كل اللي معاك.
بص كريم للجردل.
كان فاضل سبع وردات.
ناولهم لها.
طلعت ميتين جنيه بس هو رجعلها باقي الفلوس.
قالت بدهشة
إيه ده؟
إنت رجعتلي الباقي؟
أيوه.
أنا قولت الوردة بعشرين.
مش أكتر.
بصت له وهي مش مصدقة.
الراجل الغني كان واقف سامع كل كلمة.
قرب منهم أخيرًا وقال للست
حضرتك تعرفيه؟
هزت رأسها.
لأ.
أول مرة أشوفه.
بص الراجل لكريم وقال
اسمك إيه؟
كريم.
ساكن فين؟
في بولاق.
مين في البيت؟
أنا وأمي.
وسكت.
سأله الراجل
بتبيع ورد كل يوم؟
أيوه.
من بعد المدرسة؟
كريم نزل عينه وقال
بطلت مدرسة من سنة.
ليه؟
عشان أصرف على أمي.
الكلمة دي وقعت على قلب الراجل كأنها حجر.
فضل ساكت شوية.
وبعدين قال
العلاج بكام؟
أربعمية وخمسين.
طلع الراجل محفظته.
لكن قبل ما يدي له الفلوس.
رن تليفونه.
رد بسرعة.
كان المتصل مدير شركته.
يا فندم الحق بسرعة.
المصنع ولع.
وشه اتغير.
لف لكريم وقال
استناني دقيقة.
وجري ناحية عربيته.
ركب وانطلق بسرعة.
فضل كريم واقف مكانه.
بص للطريق.
استناه.
دقيقة.
واتنين.
وعشرة.
لكن العربية ما رجعتش.
ابتسم ابتسامة كلها وجع وقال لنفسه
أكيد نسي.
بص للفلوس اللي معاه.
لسه ناقصه مية وعشرة جنيه.
بص للسماء.
المطر بقى أغزر.
والصيدلية هتقفل بعد ربع ساعة.
لو مقفلتش قبل ما يوصل.
جري بأقصى سرعة ناحية الصيدلية.
دخل وهو بينهج.
لو سمحت… الدوا ده.
الصيدلي بص للروشتة.
وقال
أربعمية وخمسين.
عد كريم الفلوس.
حط تلتمية وأربعين جنيه على الترابيزة.
وقال بصوت مكسور
دول اللي معايا.
ممكن تديني العلاج وأنا هجيب الباقي بكرة؟
الصيدلي هز رأسه.
مينفعش.
يا أستاذ أمي تعبانة.
والله مينفعش.
لو سمحت.
مش بإيدي.
بدأت دموع كريم تنزل.
طب اديني شريط واحد.
