خطه فريده منال علي
الصوت صدى في كل ركن من أركان الجنينة.. صوت “وششة” خفيفة طلعت من السماعات الضخمة ، كأنها بتعلن عن بداية العرض الحقيقي.
المعازيم اللي كانوا بيتسحبوا وبيهربوا اتسمروا في مكانهم. الفضول في المجتمع ده بيمشي في الدم زي الإدمان، ومحدش يقدر يفوت لحظة زي دي، خصوصاً لما تكون الفضيحة على مستوى “كبار المعادي”.
شهد كانت واقفة عند الممر الجانبي، فستانها الأبيض الستان اتوسخ من الطين والتراب اللي في الأطراف، وطرحتها اتعلقت في فرع شجرة صغير وهي بتجري، فبقت ملوية بشكل يضحك. بصت لفريدة وعينيها مليانة رعب:
“فريدة.. إنتي بتعملي إيه؟ إنتي أكيد اتجننتي!”
فريدة ميردتش عليها. فضلت باصة للشاشة، وضغطت على زرار “التشغيل”. بقلم منــال عــلي
—
من السماعات، مطلعش أغنية الفرح، ولا طلع الميكس اللي شهد كانت منقياه وموصية عليه الدي جي.
طلع صوت.. صوت نفس عالي، وبعدين صوت ضحكة مكتومة، الضحكة دي كل اللي في الجنينة عرفوها فوراً. دي كانت ضحكة شريف.
*(صوت شريف من السماعات):*
> “يا بنتي اهدى بقى، فريدة غبية ومبتفهمش في الأوراق، طول عمرها بتثق فيا ثقة عمياء.. أنا لو مضيتها على ورق بيع نفسها هتمضي وهي بتضحك وتقولي شكراً يا حبيبي.”
*(صوت شهد وهي بتضحك بدلع ومياعة):*
> “ههههه، حرام عليك يا شريف، برضه دي صاحبتي وتعبت كتير في الشركة دي.. بس الصراحة، الفيلا بتاعتها دي لقطة، أنا من زمان ونفسي أعيش في المعادي، في مكان واسع وله جنينة وشجر، مش شقتي الضيقة اللي في فيصل. تفتكر هتعمل إيه لما تعرف إننا هنتجوز فيها؟”
*(صوت شريف بكل غدر وبجاحة):*
> “مش هتعمل حاجة.. هتصوت يومين، وبعدين هتقعد في شقة إيجار برة تندب حظها. المهم عندي نخلص ورق التنازل بتاع الفيلا ونحول الفلوس لحساب شركتنا الجديدة في دبي قبل ما ترجع من سفرية الغردقة. أمي ظبطت كل حاجة مع الدكتور عشان لو فريدة حبت تروح للقضاء، نطلع شهادة رسمية إنها مش متزنة عقلياً وبتعاني من هلاوس بسبب ضغط الشغل.. يعني قانوناً، كلامها مش هيتاخد بيه.”
—بقلم منــال عــلي
الجنينة اتقلبت لساحة محكمة صامتة. الصوت كان واضح ونقي جداً، كأنهم واقفين بيتكلموا في وسط الناس.
خالة شريف حطت إيدها على بقها وصوتت بصوت واطي: “يا مصيبتي السودا! يا فضيحتنا وسط الخلق!”
المعازيم بدأوا يبصوا لشريف ووالدته بنظرات قرف واحتقار. الوالدة وشها بقى زي قشر الليمون الذبلان، وعينيها رايحة جاية في الأرض بتدور على أي مصيبة تستخبى فيها.
