شغاله موظفه بقلم رومانى مكرم ٢
أحمد زعق بكسرة ونفاد صبر: *”يا أمي إنتي اللي كنتِ بتقولي لي لم قرشك ومتبعتش! دلوقتي بقيت أنا الغلطان؟ أنا هكلمها وهخليها ترجع الشقة الصبح والعيال معاها، والمبلغ هحوله حالا”.*
ردت الحاجة فاطمة بقلة حيلة: *”تكلم مين يا حزين؟ دي منزلتش معانا، الحاج عبد الحميد حلف يمين ما تخرج من بيته إلا وأنت واقف على رجليك في المضيفة بتسلم وتعتذر.. مرتك مبقتش مقطوعة من شجرة يا أحمد.. صلح عملتك معاها بدل ما تضيع من إيدك والبلد كلها تقاطعنا”.*
الكلمات دي نزلت على أحمد كأنها جبل ووقع عليه. نزل الصبح جري على الصرافة، وسحب كل القرش اللي كان محوشه وشايله ومستخسره في لبس العيد ومصاريف المدارس، وحول مبلغ كبير جداً باسم “منى مكرم”.
بعدها، قعد في شقته يكتب لها رسايل ورا رسايل.. بيترجاها ترد، بيبكي لها في التليفون ويقولها: *”أنا أسف.. حقك عليا.. الفلوس وصلت الصرافة وروحي استلميها، بس بلاش تخربي بيتي، أنا غريب وبشقى عشانكم”.*
منى كانت قاعدة في بيت أهلها، والموبايل في إيدها بيتبعت عليه رسايل أحمد والتحويلات.. شافت الفلوس اللي كانت بتموت عشان تلاقي ربعها عشان تجيب لبس العيد للعيال، شافت الإلحاد والتوسل في كلامه بعد ما كان بيقفل التليفون في وشها بالشهور.
حست براحة.. بس رعب الخطوة الجاية كان لسه مسيطر عليها.. أحمد في رسالته الأخيرة كتب لها جملة هزت قلبها: *”أنا حجزت تذكرة طيران ونازل مصر بعد تلات أيام.. نازل ومش راجع الكويت تاني، وهصفي شغلي هناك عشان أقف قدام أهلك وأرجعك.. بس افتكري إنك إنتي اللي اختارتي الطريقة دي يا منى”*.
منى حست إن الأمور بدأت تخرج عن السيطرة.. نزول أحمد وفسخ عقده في الكويت معناه قطع رزقه ورزق عياله، وهل نزوله ده هيكون للصلح والأصول، ولا هيكون وراه عاصفة من الغل والانتقام هتقلب حياتهم جحيم؟
حكايات رومانى مكرم تابعو صفحه رومانى مكرم
الجزء السادس:
كلمة “نازل ومش راجع تاني” نزلت على منى زي مية ساقعة في عز الشتا. الموبايل فضل في إيدها وصوابعها اتجمدت وهي بتبص للشاشة. الفرحة اللي حست بيها لما شافت الفلوس والاعتذار اتبخرت في ثواني، وحل محلها خوف ووجع بطن.. أحمد هيهد كل اللي بناه في سنتين غربة وشقا عشان العند؟ ولا هو نازل وعينه بتطق شرار وعايز ينهي كل حاجة؟
