الطريق الزراعى ٢

"حكايات الكاتبة ملك إبراهيم.." بشمهندس أمير، ممكن تحصلني على مكتبي؟" أمير اتجمد، وبعدين مشي وراه. ويوسف وقف في نص الممر، وبص للموظفين اللي قاعدين في مكاتبهم، ولليالي اللي رفعت عينيها بقلق وخضة. وقال بصوت واضح وثابت: "حابب أعرفكم على حاجة مهمة. الأستاذة ليالي... تبقى مراتي. مدام ليالي البنهاوي" ساد صمت غريب في المكتب. الموظفين بصوا لبعض بدهشة، وواحدة همست لزميلتها بخضة: "مراته؟!". وأمير بص لليالي بصدمة، وبعدين نزل راسه واعتذر بصوت واطي :" ليالي كانت واقفة مكانها، وشها أحمر من الكسوف، مش عارفة تتكلم وقلبها بيدق جامد. ما كانتش فاهمة ليه يوسف عمل كده. هو اللي قال إن الجواز ده مؤقت، وإن ملوش لازمة يتعرف :" يوسف رجع لمكتبه من غير ما يبصلها وقلبه بيدق :" وفي الاستراحة، مريم جريت عليها بلهفة: "هو ليه أعلن إنك مراته؟! وليه ما قلتيش انكم هتعلنوا؟" ليالي قالت بتوهان وقلبها ملخبط: "أنا مش فاهمة حاجة يا مريم. أنا نفسي مصدومة" بعد أسبوع وليالي مش فاهمه ليه يوسف أعلن جوازهم.. ويوسف كان بيهرب من الكلام معاها.. لحد يوم الاجتماع. كان عند يوسف اجتماع مهم مع عميل كبير لصفقة مشروع سكني جديد. طلب من ليالي تحضر عشان تسجل الملاحظات، فدخلت قاعة الاجتماعات بفستان بسيط وطرحة فاتحة، وجلست جنبه بهدوء :" العميل كان راجل في الأربعينات، اسمه أمجد، بدلة غالية وابتسامة تقيلة. كان بيتكلم عن الأرقام، لكن عينيه كانت بتروح وتيجي على ليالي بطريقة مش مريحة تخلي القلب يتقبض. وبعد شوية، قال بنبرة مرحة سمجة: "الشركة بقت أحلى كتير من أول مرة جيت فيها. عشان خاطر عيون السكرتيرة الجديدة اللي زي القمر دي، أنا مستعد أوقع على أي حاجة" ليالي اتجمدت، وحست بنار في وشها من الكسوف والضيق. غمضت عينيها وحاولت تتجاهل وقلبها موجوع. يوسف حط القلم على الترابيزة بهدوء ما قبل العاصفة ، وبص للعميل بنظرة باردة خلت الجو كله يتجمد وقلبه بيغلي عليها :" قال بهدوء يخوف: "السكرتيرة دي تبقى مراتي" أمجد اتصدم بتوتر: "انا اسف.. دا مجرد هزار اتمنى متفهمنيش غلط" قال يوسف بنبرة حاسمة كلها غيرة وحماية: "الهزار ده مش مقبول. والتعاقد معاك انتهى" وقف يوسف، وقفل ملفه، وبص لأمجد بنظرة أخيرة قوية: "مع السلامة" مسك إيد ليالي بحنية وحماية، وطلع من القاعة قدام العميل المذهول. ليالي مشيت وراه مش مصدقة وقلبها بيدق من المفاجأة :" وصلوا مكتبه، وقفل الباب، واستند عليه وهو بيتنفس بعمق وقلبه لسه بيغلي :" قالت ليالي بدهشة وقلق عليه: " يوسف! إنت لغيت صفقة بملايين عشان كلمة.. هو أكيد كان بيهزر ؟" قال بصدق وغيرة: "دا واحد وقح بيعاكس مراتي قدام عيني " قالت وهي بتحاول تبان قوية: "بس كان ممكن تعديها عشان المشروع . أنا بقيت أتعامل مع الرجالة دي، وأنا قادرة أدافع عن نفسي" بص لها، وعينيه فيها حاجة مش قادر يخبيها، حب وغيرة وخوف عليها. قال بهدوء وقلبه باين في صوته: "يغور مليون مشروع.. مش هسمح لحد يتكلم معاكي بالشكل ده. إنتي مراتي" هزت راسها ببطء، وقالت بصوت واطي موجوع: "مراتك على الورق.. كنت تقدر تتجاهل اللي حصل عادي" الجملة دي ضربته في قلبه وجعته قوي. سكت لحظة، وبعدين مسح وشه بإيده وقال بوجع مكتوم: "روحي كملي شغلك يا ليالي" خرجت من المكتب، وهي مش فاهمة هو زعلان ليه وقلبها واجعها. وفي الممر، وقفت وحطت إيدها على قلبها اللي كان بيدق بسرعة. ليه حاسة بحاجة غريبة؟ ليه صوته وهو بيقول "مراتي" بيخلي رجليها تترعش وقلبها يدق؟ :" أما يوسف، فكان واقف عند الشباك، بيبص على الشارع وهو بيتمتم لنفسه بوجع: "مراتي... على الورق بس. كلمة بتوجع قلبه وكأنها بتفكره في كل لحظة ان جوازهم هينتهي في يوم" حكايات الكاتبة ملك إبراهيم. **الفصل الخامس: عدا كام يوم بعد الاجتماع ، والجو بين يوسف وليالي كان غريب ومليان شوق متداري. مفيش خناق، ومفيش كلام كتير كمان. في العربية الصبح، كل واحد مشغول بالبص من الشباك وقلبه بيفكر في التاني. في الفيلا، يتعشوا في صمت مليان كلام مش بيتقال بس بيتحس :" ليالي كانت بتسأل نفسها كل ليلة، وهي نايمة في سريرها لوحدها وقلبها سهران: "ليه قال للعميل إني مراته بالنبرة دي؟ ليه كان صوته متغير وبيغير عليا؟" وكانت بتخبي وشها في المخدة وتقول لنفسها بحيرة: "أكيد عشان الشركة وسمعتها. أنا بتخيل حاجات غريبه وفاكره انه ممكن يحبني " ويوسف كان بيقعد في مكتبه بالليل، وقدامه الأوراق، لكن ما بيقراش حرف. كان بيفتكر نظرتها لما قالت "على الورق بس". والجملة دي بتتردد في ودنه كأنها بتتعمد توجعه وتوجع قلبه :" في صباح يوم جديد، دخلت السكرتيرة تقول إن عميلة جديدة وصلت وعايزة تقابل يوسف شخصيًا. اسمها ريم، سيدة أعمال في أواخر العشرينات، صاحبة شركة ديكور كبيرة وعايزة تتعاقد مع شركتهم على مشروع مشترك :" دخلت المكتب بخطوات واثقة، لابسة فستان قصير أحمر بيبرز كل حركة، وكعب عالي، وبرفان بيوصل قبلها بخطوة. ابتسمت ابتسامة واسعة وقالت بدلع: "أستاذ يوسف البنهاوي! أخيرًا بقابل الشخص اللي كل السوق بيتكلم عنه" يوسف وقف باحترام رسمي، وسلم عليها بطرف إيده ببرود: "أهلًا بحضرتك يا مدام ريم. اتفضلي" قعدت ريم قدامه، وحطت رجل على رجل بحركة مقصودة، وبدأت تتكلم عن المشروع. لكن كل جملتين، كانت تقرب جسمها ناحيته، وتضحك ضحكة ناعمة وتحط إيدها على الملف جنب إيده :" قالت بدلع: "أنا بصراحة معجبة بشغلك قوي يا أستاذ يوسف. مش كل يوم أقابل راجل شاب وناجح ومتفاهم كده" يوسف ابتسم بتحفظ: "دا بفضل فريق الشركة يا مدام ريم" قالت وهي بتبص له: "لا لا، أنا شايفة إن الفضل ليك إنت. وأنا بحب الشغل مع الناس اللي بتفهمني" في الوقت ده، كانت ليالي في الممر، ماسكة ملف عايزة توقعه من يوسف. وقفت قدام باب المكتب المفتوح نص فتحة، وسمعت الضحكة الناعمة. بصت من الفتحة، وشافت ريم وهي قاعدة قدام جوزها بالفستان القصير، ومقربة منه بشكل خلى دمها يغلي وقلبها يوجعها وغيرة أول مرة تحس بيها بجد :" حست بحاجة غريبة بتولع في صدرها. إيديها اتشدت على الملف. قلبها دق بقوة، وحست بغيرة مش عارفة تسميها. قالت لنفسها بوجع: "أنا مالي؟ هو مش جوزي بجد" بس رجليها ما سمعتش الكلام، وقلبها سبقها، ودفعت الباب ودخلت :" ابتسمت بنعومة، وقالت بصوت هادي ومهذب جدًا بس جواه غيرة حلوة: "إزيك يا حبيبي؟ آسفة لو قاطعتكم" يوسف رفع راسه بدهشة وقلبه وقع من الكلمة. كلمة "حبيبي" نزلت عليه زي شرارة كهربا دافية. بس ملامحه فضلت ثابتة بالعافية وفرحته باينة في عينيه :" ليالي قربت من المكتب، وحطت الملف قدامه بحركة رقيقة، ووقفت جنبه قريبة قوي، وإيدها ناعمة على كتف كرسيه كأنها بتقول ده بتاعي أنا. وبصت لريم بابتسامة بريئة كلها غيرة حلوة: "حضرتك أكيد عميلة جديدة . أهلا بيكي. أنا ليالي، مرات الأستاذ يوسف" ريم اتجمدت ابتسامتها شوية، وبصت لليالي من فوق لتحت بضيق: "مراته؟ ما كنتش أعرف إنه متجوز" قالت ليالي بنعومة وثقة أول مرة تحس بيها: "إحنا لسه متجوزين جديد، ومش بنحب نعلن كتير. بس بما إن حضرتك هتبقي شريكة في الشغل، فلازم تعرفي. وبعدين... جوزي بيحب احضر معاه الاجتماعات دا لو مش هيضايقك.. صح يا حبيبي؟" يوسف كان بيكتم ضحكة ما عندوش قدرة يخفيها، وفرحة كبيرة بتتفرد جواه وقلبه بيرقص. قال بصوت دافي وحنون: "صح يا حبيبتي " ريم قامت من مكانها بسرعة، وابتسامتها بقت رسمية خالص وقالت بضيق: "طبعًا... مبروك. أنا شكلي لازم أمشي. هنتواصل بالإيميل بخصوص المشروع" وخرجت من المكتب بخطوات أسرع من اللي دخلت بيها :" أول ما الباب اتقفل، ليالي اتنفست بعمق وهي بتحاول تاخد نفسها. وشها كان أحمر من الكسوف، وقلبها بيدق جامد من اللي عملته. فجأة أدركت اللي عملته، وحطت إيدها على بقها بكسوف :" قالت بسرعة: "أنا آسفة... أنا..." يوسف قام من على كرسيه ببطء، وقف قدامها وهو بيبتسم ابتسامة هي ما شافتهاش قبل كده. ابتسامة مليانة دفا وحنان وحب :" قال بحب: "ليه آسفة؟" قالت وهي بتبص في الأرض: "أنا... أنا ما كانش قصدي... يعني كنت بس عايزة أحميك من..." قال بابتسامة: "تحميني؟" قالت بكسوف: "آه... من... من الموقف" قال وهو بيقرب: "الموقف اللي كانت فيه واحدة بتحاول تلفت نظري ومتعرفش ان انا راجل متجوز بنت زي القمر؟" ليالي بصت للأرض وهي بتحاول تلاقي إجابة، وما لقيتش غير قلبها اللي بيدق. يوسف ضحك ضحكة خفيفة وقال بحب: "شكرًا يا ليالي. دي أجمل حماية شفتها في حياتي" رفعت عينيها له، وعينيهم اتقابلت، وفضلوا ساكتين لثواني طويلة مليانة كلام. كان في كلام كتير هيتقال، لكن كل واحد منهم خاف وقلبه بيدق :" وقالت بسرعة وهي بتتراجع بخجل: "أنا لازم أرجع شغلي" وخرجت وقلبها طاير :" بس العناد كان أقوى من الفرحة. في اليوم ده بالليل، رجعوا الفيلا، وكل واحد منهم متردد وقلبه مليان كلام. ليالي كانت عايزة تسأله: "إنت فرحان؟ بتحس زيي؟" ويوسف كان عايز يقول: "أنا بحبك" لكن كل واحد فيهم استنى التاني يبدأ :" وبعد كام يوم، حصلت الخناقة الاكبر بينهم . كان بسبب ان ليالي رجعت متأخرة من الشركة بعد ما اشتغلت مع أمير على تقرير، ويوسف كان عنده اجتماعات برا الشركة طول اليوم ولما رجع البيت ملقهاش.. كان مستنيها في الصالة، ووشه متجهم وقلبه قلقان عليها :" قال بضيق طالع من خوفه: "إنتي كنتي فين؟" قالت ببراءة: "في الشركة . كنت بخلص التقرير" قال بغيرة: "مع بشمهندس أمير؟" قالت: "آه، وهو بيساعدني. فين المشكلة؟" قال وصوته عالي من غيرته وقلقه: "المشكلة إن الوقت أتأخر وكل موظفين الشركة روحوا من بدري " قالت بعناد ووجع: "أنا كنت بخلص شغلي مش بلعب.." اتكلم يوسف ب عصبية:" يولع الشغل.. انتي مراتي يا ليالي.. ولازم تحافظي علي اسم الراجل اللي انتي شايله اسمه." ليالي ردت ببكاء:" انا محافظة علي إسمك كويس.. ولو بتشك فيا تقدر تطلقني " سكتوا الاتنين، والكلمة وقعت بينهم زي حجر تقيل ووجعت قلبهم هما الاتنين. يوسف حس إن قلبه بيتقطع، لكنه قال بجمود وجع قلبه: " عايزة تطلقي يا ليالي؟" ليالي عينيها دمعت ومقدرتش تنطقها تاني، وطلعت السلم جري وقلبها موجوع. وفي أوضتها، قعدت على السرير وبكت بحرقة. ويوسف فضل واقف في الصالة، ضرب إيده على الحيطة بوجع وهو مش عارفه نهاية وجعهم ايه. الليل مر طويل على الاتنين. ولا حد نام وكل واحد قلبه عند التاني :" قرب الفجر، يوسف سمع صوت خفيف جاي من الحديقة. نزل بهدوء، ولقى ليالي قاعدة على الكرسي الخشب تحت شجرة الياسمين، وعينيها منتفخة من البكا وشكلها يقطع القلب. الياسمين كان بيفوح، والنسمة باردة وحنينة :" قرب منها، وقعد على الكرسي التاني بقلب حنين وقال برقة: "ليالي" ما ردتش وفضلت بتبص بعيد بدموع :" قال بصوت كله ندم وحب: "أنا عمري ما شكيت فيكي.. أنا آسف" بصت له بسرعة ودموعها نزلت وقالت بصوت مبحوح موجوع: "إنت عندك حق.. انا اللي غلطت" قال بصدق وقلبه بيدق بحب : "أنا اتصرفت بغباء. وقلتلك كلام مش من قلبي.. بس صدقيني انا بخاف عليكي " قالت وهي بتعيط: "وأنا كمان قلت كلام مش من قلبي" سكتوا شوية. الصبح كان بيبدأ ينور في السما بلون هادي، والطيور بدأت تصحى بصوت يطمن :" يوسف أخد نفس عميق، وبص لها بعينين مليانة صدق وحب كبير شايله من زمان وقال: "ليالي، أنا مش هقدر أكمل كده. أنا اتجوزتك لأنك بقيتي أهم حاجة في حياتي من أول ما شفتك بتجري في الطريق وبتستنجدي بيا. أنا بحبك يا ليالي. بحبك من قبل ما إبن عمك يجي ياخدك واتجوزتك عشان بحبك مش عشان اي حاجة تانيه" ليالي حطت إيديها على بقها، ودموعها نزلت من غير ما تحاول توقفها من الفرحة. قالت وهي بتشهق بفرحة ودموع: "إنت... إنت بتتكلم جد؟" قال بحب وصدق طالع من قلبه: "جد أكتر من أي حاجة قلتها في حياتي" ضحكت وهي بتبكي، ومسحت دموعها بفرحة طفلة وقالت: "وأنا كمان بحبك. من يوم ما أنقذتني أول مرة من إبن عمي في الطريق. أنا بقيت متعلقة بيك من اللحظة دي، بس كنت خايفة. خايفة تكون بتشفق عليّا، وخايفة أتعلق بحد ويسيبني زي كل الناس ما سابتني" قرب منها، ومسك إيديها الاتنين بين إيديه بحنية وحب كبير، وقال: "عمري ما هسيبك. دي مش شفقة يا ليالي. انتي أحلى حاجة حصلت لي في حياتي كلها" سندت راسها على كتفه، وحست بدفا ماحستوش في حياتها كلها، أمان أول مرة تحسه بجد. ويوسف حاوطها بدراعه بحب، وهم قاعدين تحت الياسمين بيتفرجوا على الشمس وهي بتطلع وقلبهم بيطلع معاها.. كانت بداية يوم جديد.. وبداية حياة جديدة بتجمعهم مع بعض. واتحول الجواز اللي بدأ على الورق لحقيقة مليانة حب. وبعد كام يوم.. يوسف قدم لليالي خاتم بسيط وجميل بكل حب، وقال لها إنه عايز يعمل فرح كبير يليق بيها، فرح مفيهوش غير الناس اللي بتحبهم بجد. أهله رجعوا من السفر مخصوص، وأمه حضنت ليالي وبكت من الفرحة وقالت بدموع: "الحمد لله إن ابني لقى نصه التاني" وفي يوم الفرح، وقفت ليالي في الحديقة بفستان أبيض بسيط زي قلبها، والياسمين حواليها زي حلم جميل. مريم صاحبتها كانت جنبها بتضحك وتعيط في نفس الوقت من الفرحة، وأم هناء بتدعيلها من بعيد بقلب أم :" وفي الصف الأخير، لمحت ليالي عمها الحاج مصطفى واقف لوحده. كان جاي لوحده من غير ابنه، وبص لها بنظرة هادية وحنينة كلها ندم ورضا. ما اتكلمش، بس هز راسه مرة واحدة، كأنه بيقولها إنه سامحها وإنها استحقت السعادة. ابتسمت له بدموعها، وهز راسه تاني وراح بهدوء :" يوسف قرب منها، وقال بصوت كله حب: "جاهزة؟" قالت بابتسامة منورة: "جاهزة" ومسك إيدها بحب، وبقوا مع بعض، من غير خوف ولا هروب ولا عناد، قلبين ماشيين في طريق واحد :" وفي الليل، بعد ما الضيوف مشيوا، قعدوا في الحديقة تاني، تحت شجرة الياسمين اللي شهدت على أول اعتراف بحبهم. ليالي سندت راسها على كتفه، وقالت بهدوء وفرحة: "فاكر أول مرة قابلتك؟" قال وهو بيبوس راسها بحب: "فاكر كل ثانية وكل نظرة" قالت بضحكة رقيقة: "عمري ما كنت أتخيل إن عربية تعطل علي الطريق ممكن تغير حياة كاملة" ضحك يوسف وباس راسها بحنان وقال: "ولا أنا. بس أحلى يوم في حياتي كان ده" وفضلوا قاعدين لحد ما النجوم ظهرت ولمعت في السما . وفي الدنيا الواسعة اللي كانت زمان مخيفة وضلمة، بقى ل ليالي بيت أمان تلاقيه كل ليلة، وراجل بجد يحميها ويراعيها.. وبقى ليوسف قلب يشاركه حياته وأحلامه.. واكتملت سعادتهم مع اكتمال حكايتنا.. حكايات الكاتبة ملك إبراهيم. **النهاية**