اختفاء جوزي روماني مكرم
وقفت على رجلي وقلت بابتسامة نصر:
* “حلو أوي.. كده اللعبة اتقلبت. عصام فاكر إن سوزي ضهره، ميعرفش إنها الحية اللي بتلدغه من وراه. اطلب لي سوزي يا متر.. ”
تاني يوم الضبح، في كافيه هادي بعيد عن الأنظار، قعدت أنا والأستاذ كمال. دخلت سوزي، ووشها كان باهت، ومن غير الذهب بتاعي ولا الشنطة الماركة، باين عليها البهدلة بعد ليلة واحدة في الشارع. قعدت وحطت رجل على رجل بتحاول تبان قوية وقالت بقرف:
* “خير يا مدام؟ جايباني هنا ليه؟ عصام قالي إنك زمانك بتجهزي شنطتك عشان تروحي السجن بالورقة اللي معاه.”
طلعت من شنطتي تليفوني، وفتحت له ملف التحويلات وصور الشيكات، وحطيتها قدام عينيها. سوزي أول ما شافت الأرقام والأسماء، وشه بقى أزرق، وإيدها سابت النظارة الشمسية وقعت على التربيزة.
قلت لها بصوت واطي وفيه فحيح أعلى من فحيح جوزي:
* “عصام لو عرف إنك كنتي بتسرقيه وبتبيعي أسراره للمنافسين، تفتكري هيعمل فيكي إيه؟ ده غير إن الشيك الـ 2 مليون جنيه اللي في جيبك بقى حتة ورقة ملهاش قيمة لأن الحساب اتجمد بسببي.. يعني إنتي دلوقتي متجوزة واحد شقته ضاعت، وفلوسه اتجمدت، وهيتحبس بتهمة التزوير.. وإنتي طالعة من المولد بلا حمص، وفوقيها قض..ية جاسوسية شركات وسجن!”
سوزي بلعت ريقها برعب، وبدأت تترعش وقالت بصوت متقطع:
* “إنتي.. إنتي عايزة إيه مني؟”
ميلت عليها وقلت لها:
* “عصام معاه ورقة تنازل مزورة باسم أبويا.. الورقة دي في جيبه أو في مكتبه. بكره الصبح، الورقة دي تكون في إيدي.. وفي المقابل، أنا مش هبلغ عنك، وهسيبك تاخدي الشنط والذهب اللي سرقتوهم مني وتهربي بيهم بره البلد قبل ما عصام يكتشف إنك لستيه في الحيط.. ها؟ شفتي أنا طيبة إزاي؟”
سوزي بصت لي بنظرة خوف وذهول، وفضلت ساكتة لثواني بتفكر في مصلحتها.. وفي الأخر هزت رأسها بالموافقة.
الخطة اشتغلت.. وفي نفس اليوم بالليل، سوزي كلمتني وقالت لي بنبرة مرعوبة: “عصام نايم في لوكاندة معفنة في وسط البلد بعد ما اضربت عليه شيكات تانية من الموردين، والورقة في محفظته.. أنا هخدره واخدها وأجيبهالك، بس تأمني خروجي من مصر!”
الساعة بقت 1 بعد نص الليل.. كنت واقفة في المكان المتفق عليه مستنية سوزي تجيب الورقة اللي هتحمي اسم أبويا وأملاكي. وفجأة، لقيت عربية سوزي بتقف، والباب بيفتح.. بس اللي نزل منها مكنتش سوزي!
