قلب بارد بقلم مروه البطراوى
نهضت ببطء واعتدلت ونظرت إليه بخجل قائلة: صباح النور يا شبل، أنا كمان بحمد ربنا علشان بقيت جوزي وعلشان فهمتني صح قبل فوات الأوان، وزعلانة امبارح اني نيمتك من غير عشا.
تصنع الجوع قائلًا: عتفكريني ليه عاد؟، خابرة أنا محطتش الزاد في معدتي من ميتا؟، من أول امبارح عشية، لولا هانم خيتي غصبت عليا أكل، ومفطرتش امبارح.
عضت منة على شفتيها وانتفضت قائلة: معلش يا شبل يا حبيبي، أنا كمان بس الصراحة لما قلت هنسافر فطرت علشان الطريق طويل، وشغل البيت هنا هد حيلي، هقوم أعملك فطار.
وبالفعل ركضت إلى المطبخ لتحضير الفطار فذهب خلفها يمازحها قائلًا: وعتعمليلي ايه نفطرو بيه؟، أنا عاوز أتغذى، تحبي أساعدك؟، خابرة كنت في الجيش عاكل العساكر كلياتهم، ولا أجدعها شيف.
نظرت إليه بإعجاب قائلة: معقول!، بقا أنت يا شبل بتعرف تطبخ؟!، أه!، علشان كده كنت قاعد في شقتنا قبل ما نتجوز!، وأنا أقول البوتجاز شكله قديم ليه؟، هما استخسروا فيا واحد جديد.
ابتسم لإعجابها قائلًا: كيف ده عاد؟!، بجا حد عيستخسر في زينة البنتة حته بوتجاز، ده احنا نولعوا في روحنا عشانك يا جمر، جال نستخسروا جال!، طب بالك مكنتش عشتريه، لأنك تستحقي الخدمة.
تعالت ضحكاتها قائلة: للدرجة دي!، هتولعوا في روحكم!، طب ده حتى مرات عمي ممكن تطخني بالبندقية لو سمعتك بتقول كده، وبعدين مين يعملك الأكل الحلو لما أقعد والكل يخدم عليا، لا أنا مش بحب الخدمة.
قاما بتحضير الإفطار سويًا وذهبا إلى منزل صديقتها حيث العرس المقام بين أهلها ليبتسم شبل بمرح على زوج صديقتها قائلًا: ليه جوز صاحبتك حاطط وشه في الأرض كيف الحريم عاد؟، يكونش خايف؟!، وصاحبتك ما شاء الله شكلها خابرة كيف اللي عيوحصل.
كتمت منة ضحكاتها قائلة: ايه اللي أنت بتقوله ده؟!، عيب والله!، ده خجول جدًا، وبعدين هي كمان عبيطة ولا تعرف حاجة، دي بتدعي ليلتها تبقا عاملة زى ليلتي.
مط شبل شفتيه قائلًا: يا بوي!، جوليش كان ليكي ليلة من أصله!، احنا ليالينا لسه مبدأتش واصل، بس عوعدك هتبجى ولا ليالي ألف ليلة وليلة، عتحكي عليها لأولادنا.
نظرت وهي ترفع كتفيها قائلة بمزاح: ليه يعني؟!، هي دي مش ليله جوازنا اللي سيبتني فيها وروحت نمت في الأوضة التانية؟!، وصباحيتي اللي كانت فيها دمعتي علي خدي؟
