عزيزه منال كريم

صباح: ماشي

//////
كانت طالعة عزيزة على السلم و هي هلكانة من شغل طول اليوم

فتحت لمياء باب الشقة و قالت ببرود: اهلا

و سكتت شوية و بعدين قالت بسخرية: تحبي اقولك ام أحمد و لا يا عروسة

ضحكت عزيزة و قالت: الاتنين حلوين

لمياء: و انتي بقي مش عارفة ليه إبراهيم اتجوز واحدة زيك

كان إبراهيم طالع على السلم و استنا يسمع كلامهم

ردت عزيزة : و تفتكري ايه السبب أن إبراهيم اتجوز واحدة زي..

لمياء: و أنا مالي يا اختي روحي اساليه انتي.

ضحكت عزيزة: الا طيب ما تقولي انتي و هيكون سر بينا

لمياء: هو الموضوع مش غريب بالنسبة لك

عزيزة بعصبية: بقولك يا حلوة انا مصدعة،، عندك كلام قولي مش عندك غوري من وشي

لمياء: أغور، اخس عليكي ، ده أنا خائفة على مصلحتك، ها وفر عليكي، يعني واحد معدي ٣٥ سنة و لحد دلوقتي من غير جواز تفتكري ايه السبب

عزيزة: عادي بتحصل، و على فكرة إبراهيم اتجوز خريجة جامعية و مفيهاش مشكلة أني مطلقة و عندي ابن، ده اول حاجه، أما ايه سبب تأخر إبراهيم في الجواز، ده من حظي علشان اتجوز راجل و سيد الرجالة ، يحبني و يخاف عليا و على ابني، تجي احكيلك قصة حبنا.

لمياء بعصبية: حب ايه يا ما أم حب ده جواز صالونات.

عزيزة: و ماله ،انجح قصص الحب تبدأ في الصالونات احسن ما تبدأ على كافيهات.

لمياء بغيظ: براحتك صدقي نفسك، انا خايفة على مصلحتك

عزيزة: استني ما اضحك ، انا شايفة واحدة الغيرة مولعة قلبها علشان هيما بقي جوزي و حبيبي انا ، فابعدي عني و عن جوزي يا قطة.

طلعت عزيزة بعد ما كانت لمياء عايزة تغيظها و تعمل مشكلة معها توصل لخناقة بينهما،بس عزيزة كانت ذكية.

إبراهيم اللي كان سمع كل كلمة من عزيزة و كان طائر من الفرحة من كلامها و طلع السلم و كانت لسه لمياء وافقة ،عدي عليها كأنه هواء.

لمياء: إبراهيم عايزة اتكلم معك

طلع إبراهيم من غير رد

و هي دخلت شقتها بعصبية..

///////////((
دخل الشقة ،كانت عزيزة في الاوضة

قال بصوت عالي : عزيزة، يا عزيزة

كانت دي اول مرة يقول إسمها.

خرجت من الاوضة بسرعة و قالت : نعم

طريقة كلامها كانت مختلفة عن طريقتها مع لمياء

إبراهيم: بتعملي ايه

عزيزة: هغير ل احمد ، عايز حاجه

إبراهيم: لا خالص مش مهم

عزيزة: قول كنت عايز ايه

إبراهيم: كوبية شاي

مشيت ناحية المطبخ و قالت: دقيقة واحدة