عزيزه منال كريم
عزيزة: ايه الفيلم الهندي ده، انا اسفة مش بتريقة بس محدش يصدق كلامك ده يعني ايه تاخد فلوسك لمدة خمس سنين و أنت مصدق كلامها و مكمل معها.
إبراهيم بحزن: عندك حق ده غلطي انا، عارفة الإدمان أنا كده مدمن بحبها، خدي الاسوء ابن خالتها خد الفلوس و هرب و هي رجعت ندمانة و طلبت السماح
عزيزة: اوعي تقول قدرت تسامح
نزلت دموعه و قال: أيوة ،و كنت مستعد اكمل معها بعد اللي حصل، بس امي حلفت لو الجوزة دي تمت لا هكون ابنها و لا تعرفني
عزيزة: عندها حق، أنا مش قادرة استوعب أن ممكن حد يعمل كده و انتي تجي تقول ترجع بكل سهولة.
إبراهيم: مش بقولك ادمان، قعدت سنين رفض الجواز لحد ما وصلت ٣٥ سنة و طبعا روحت للبنات كتير و اترفضت بسبب اني كبير.
عزيزة: و علشان كده اختارتني ،علشان مطلقة و معي طفل و أقبل باي حاجة صح.
إبراهيم: انا اسف يا عزيزة ،كان المفروض اقولك كل الكلام ده يا تقبلي أو ترفضي
اتعصبت عزيزة و لقت أن دي فرصة علشان ترد على طريقة كلامه معها اول مرة ، قالت: انت عارف عني كل حاجه و حطيت شروط صعبة ، و خلتني احس أنك عملت معي معروف كبير علشان موافق تجوزني، و دلوقتي أنت حطتني في وضع اني اكون شاهدة على حبك الكبير لبنت عمك و هي في الطالعة و النازلة تحرق دمي، دلوقتي عرفت سبب كلامها معي ، معلش مستني مني ايه، اقولك تمام و مفيش حاجة، لا أنت كاذب، و انا مش مسامحك..
و دخلت اوضتها و هي مضايقة.
و قام خرج من الشقة كلها بسبب زعله من نفسه.
/////////
مقلتش حد تتكلم معه غير صاحبتها
عيطت و هي بتقول : شوفتي اللي حصل
علشان سمر من غير ما تفهم بقت تندب و تقول: ايه اللي حصل، عملوا فيكي ايه اتكلمي ،مانا قولت بلاش الجوزة دي.
عيطت عزيزة و قالت: اسكتي يا سمر و اسمعني الاول ،أنا مش ناقصة نصائح من حد
سمر بهدوء: طيب اتكلمي يا حبيبتي
حكت عزيزة عن كلام إبراهيم لها و بعد ما خلصت قالت بحزن: أنا كنت مجرد اخر باب له، جالي بعد ما أترفض من الكل،جالي بعد سنين يحب فيهم بنت عمه و جالي بعد ما خدعته.
سمر بهدوء: طيب اهدي و اسمعي كويس
مسحت دموعها و قالت: أنا مقهورة اوي.
سمر: بعد الشر عليكي من القهرة، معاكي أن المفروض هو كان قالك قبل الجواز، بس برضو مش غلط أنه مقالش هو اللي حصل كان ماضي و عدي
عزيزة بعصبية: اولا مش ماضي هو لسه بيحبها بدليل كل ما تجي تتكلم قدمه يكون اخرس و ميقدرش يرفع عينه فيها، ثانيا ، ما هو عارف عني كل حاجه ،ليه أنا كمان معرفش عنه كل حاجه
