الطريق الزراعى ١
“حكايات الكاتبة ملك إبراهيم.. على الطريق الزراعي. مفيش غير صوت الرياح وهي بتلعب في سنابل القمح بشقاوة، وصوت عربية يوسف البنهاوي وهي بتشق الطريق بهدوء”
يوسف كان راجع من اجتماع بعيد، جسمه مهدود وتعبان، وراسه تقيل من كتر الأرقام والعقود والصفقات. هو تلاتين سنة بس، بس شايل هم ومسؤولية تخلي أي حد يحس إنه عدى الأربعين بكتير. كان ماسك الدريكسيون بإيد واحدة وعينه سرحانة وبيفكر في اللحظة اللي هيوصل فيها الفيلا ويرمي نفسه على السرير ويرتاح :”
وفجأة سمع صوت غريب طالع من تحت الكبوت، وبعدين العربية بدأت تترعش وتبطأ لحد ما وقفت خالص في نص الطريق :”
ضرب يوسف على الدريكسيون بضيق وخنقة طالعة من قلبه وقال: “يا ساتر! دلوقتي بالذات؟”
حاول يدور المحرك مرة واتنين وتلاتة، ومفيش فايدة. نزل من العربية وهو بيرفع كُم قميصه بزهق، ورفع الكبوت فطلع له دخان خفيف سخن. بص حواليه بلهفة، مفيش عربية ولا موتوسيكل ولا حتى فلاح راجع من غيطه. الطريق فاضي على الآخر، والشمس بتغرق في الأفق بلون برتقاني حزين :”
قعد يفتش في المحرك بإيده اللي اتملت شحم، وهو بيتمتم لنفسه بصوت تعبان: “جايه تعطلي في طريق فاضي زي ده ، لسه باقي الطريق طويل ”
فضل يحاول يصلح فيها حوالي نص ساعة، وإيديه اسودت من الشحم، وعرقه نزل على جبينه ونقط على هدومه. وأخيرًا لقى الوصلة المفكوكة وركبها، وجرب يدور المحرك فطلع الصوت المنتظم اللي يريح القلب :”
ابتسم يوسف بارتياح وقلبه بيدق بهدوء وقال: “أخيرًا”
مسح إيديه في منديل قديم، وقفل الكبوت، وقبل ما يركب العربية.. جه له صوت من بعيد. صوت صراخ حاد بيشق سكوت الغيط وبيوجع القلب :”
صرخة بنت بصوت مقطوع من العياط: “الحقوني! الحقوني يا ناس!”
اتجمد يوسف مكانه، وقلبه اتقبض فجأة، والتفت ناحية الصوت. من بين شجر الدرة العالي، طلعت بنت بتجري بكل قوتها، طرحتها وقعت على كتافها وشعرها الأسود منكوش من الجري والخوف، وجزمتها الفلاحي مليانة طين. كانت بتجري ووشها مليان رعب حقيقي، ودموعها نازلة من غير ما تمسحها كأنها نسيت إزاي تمسح دموعها :”
وورا البنت بمسافة، راجل ضخم لابس جلابية فلاحي واسعة، كتفه عريض وجسمه تقيل، بيجري وهو بيلهث وبيزعق بصوت يخوف :”
البنت شافت يوسف والعربية الواقفة، وكأنها شافت النور بعد ظلام طويل. جريت عليه بأقصى سرعة، ومسكت دراعه بإيدين بتترعش جامد، واختبت ورا ضهره كأن ضهره ده هو الحيطة الوحيدة اللي هتحميها في الدنيا :”
