سحر سمره امل نصر 3

صباح الخير يا” صافى ”
قالها ” تيسير ” بمرح وهو يدلف لداخل المحل .. فابتسمت هى ابتسمة صفراء لترد على مضض :
– اهلاً .. صباح النور .
ابتسمامته ازدادت اتساعاً وهو يجلس امامها رافعاً لها احدى حاجبيه :
– طب ليه كده بس الوش الخشب دا ياصفصف ؟
حدقت به حانقة :
– بقولك ايه يا” تيسير ” انا مش فاضية لهزارك البايخ ده على اول الصبح.. وعفاريت الدنيا كلها بتنطط فى وشى
عقد حاجبيه باندهاش :
– ليه بس ياست الكل ؟ مين اللى مزعلك ياقمر.
مالت برأسها امامه مستنده بكفيها على سطح المكتب الزجاجى :
– عشان ماعندكش احساس وناسى كلامك اللى قولتهولى .. و اللى صحى فى قلبى الأمل من جديد ودلوقتي بقى انا قاعدة معلقة لا طايلة سما ولا ارض .
– ااه .
قالها وهو يرجع بظهره للمقعد يستوعب ماقالته قبل ان يقول :
– معلش ياستى ان كنت نسيت .. بس انا فى ايدى ايه بس ؟ انا ساعة ما كلمتك كنت ملاحظ بجد انه ابتدى يحس بيكى بس بعد مرض تيته” لبنى ” معرفش ايه اللى حصل ؟وبقيت حاسس انه اتغير ..
تابعت هى على حديثه :
– هو فعلاً اتغير بس عليا انا بس .. انت مشوفتوش امبارح يا” تيسير ” دا بيسلم عليا برسميه وكأنى واحده غريبة عنه .. دا مرضيش حتى يقعد دقيقة معايا وانا قاعدة مع الست ” لبنى “بقرالها فى كتاب ممل وقاعده مملة .. كله دا عشان خاطره وهو خرج ولا همه .
– يااااه لدرجادى !!
قالها “تيسير “بتعجب فتابعت هى تومئ برأسها:
، لدرجادى واكتر كمان .. انا قلبى مش مطمن وعندى احساس ان البت الخدامة دى ليها يد فى التغير .
سألها ببلاهه:
– خدامة مين ؟
اجفلته بنظرة مرعبة فتذكر على الفور:
– اه انتى قصدك على ” سمره” .. معقول؟!
عقدت ذراعيها تقول :
– ومش معقول ليه بقى؟ انت نفسك مش ملاحظ انه اتغير ؟.
اجابها بدون تفكير :
– هاكدب عليكى لو قولت لا.. انا مش عايز احرق دمك بس ” رؤوف ” بطل ما يسهر معانا نهائى..وكمان بيجى الشغل متأخر وما بيصدق يخلص ويروح بسرعه وكأنه ……
رددت خلفه بصوتٍ جهورى :
– وكأنه مش متحمل الوقت فى بعدها !!.. ااه
قالت الاَخيره وهى تضرب بكفيها على سطح المكتب بحريقٍ شب بصدرها ..اراد ان يخفف عنها :
– خلاص يا” صافى ” .. حتى لو كان اللى فى مخك صح .. مسيره هايرجع تانى لعقله بعد ما ياخد غرضه منها .
حدقت بعيناها اليه صامتة فتابع هو :
– بلاش تبريقلى كده .. دى مهما كان شغالة عنده يعنى مش هايحصل اكتر من كده .. ومسيره هايرجعلك بس بعد مايفوق من النزوة .. وساعتها بقى تيجيلى انا على طبق من فضة .
قال الاخيرة بصوت خفيض .. فصاحت هى بصوتها العالى اجفلته :
– انت يازفتة ياللى اسمك ” سعاد ” تعالى شوفى الزباين .